‘Judi’ popitutuk manuk, tolu kusai nadanda RM1,500

KOTA KINABALU: Tolu kusai pialatan diolo songulun poingigit kad IMM13, ontokon danda RM1,500 toiko jiilon tolu wulan, id Kuut Majistret, sabap nokoompit id kaparagatan pimpukiauan popisaung manuk.

Majistret Cindy Mc Juce Balitus pinaparatu do ukuman dilo kuminaa di Chong Kim Fui@Daniel, 44, James Yong Ket Fah, 65, om Sabrie Abdul Suhud, 22, kalapas minangakun kisala.

Noilaan iyolo nokoompit id pimpukiauan dilo ontok 27 Ogos jam 5.10 sosodopon id iso Lamin Kampung Kadayun, Putatan.

Montok dilo, kotolu-tolu natandasan dinawa tumanud Seksyen 6 (1) Akta Pertaruhan 1953 ih obuli ontokon danda RM5,000 toiko kojill solinaid onom wulan, toiko goduo-duo danda dilo.

Tumanud kopoilaan kes, pinoporuput songowian sontimungan pulis pinapanau do operasi ‘Ops dadu’ id tadau iso’i, soira nokotorimo kopoilaan kokomoi do pimpukiauan popisaung manuk dilo.

Bogian pulis minamagakom siam kusai om duo tondu, om minamagahau barangan ih kikotumbayaan gunoon id pimpukiuan dilo.

Asil pinomorisaan nokopokito do toinsanan ‘suspek’ minangakun nokoompit id pimpukiuan popisaung manuk dilo.

Ponuhuannogi kuut do 14 tinan manuk ih nahau do pulis dilo punsoon di bogian pangadawaan.

Namot dilo, Sabrie ponuhuan pataakon doid Koupisan Imigresen montok laang potilombus.

Upisor Mangadawa Insp Suzie@ Stephanie Kupit minaganu laang montok bogian pangadawaan.

Id suang kes misusuai, Majistret Jessica Ombou Kakayun minongontok danda RM1,200 kumaa turu nakasala trafik, pialatan diolo songulun tondu sabap pinapanau padsakaian id koyuon nawuk.

Iyolo pinaratu ukuman dilo kalapas minangakun kisala tumanud Seksyen 45A (1) Akta Padsakaian Ralan 1987.

Kinasalaan dilo winonsoi ontok 11 Januari 2015 gisom 4 September id bogian Penampang om longkod pogun.

Ukuman di poobion, danda pialatan RM1,000 gisom RM6,000 toiko jiilon solinaid sontoun.

Sokiro ko au kabarai danda dilo, kojiil solinaid timpu duo tadau.

Upisor Mangadawa Insp Hanif Mamyudi mantad Koupisan Trafik luminansan bogian pangadawaan.