Kusai nadanda RM30,000, minamagaji tolu ‘migran’ tolosok kuminaraja id tapak pamansaian

KOTA KINABALU: Kuut Sesyen hiti pinaparatu do ukuman danda RM30,000 toiko jiilon siam wulan kumaa songulun kusai sabap kasalaan minamagaji tolu ‘migran’ tolosok.

Hakim Azreena Aziz pinaparatu do ukuman dilo kuminaa di Lim Sing Kiong@ Ah Kong, kalapas minongolon kapangakuan dau kumaa kisala, hinonggo ontok tadau Koiso montok ponorinaan kes.

Natandasan noilaan minamagaji tolu ‘migran’ tolosok id iso tapak pamansaian id watas Sipitang, ontok 20 Mei.

Sabap kasalaan dilo, ih Lim dinawa tumanud Seksyen 55B Akta Imigresen 1959/63 (Pindaan 2002), danda minimum RM10,000 om maksimum RM50,000 toiko jiilon soliniad 12 wulan, toiko goduo-duo danda dilo.

Montok dilo, natandasan dandaan RM10,000 toiko jiilon tolu wulan montok potitikid pakaraja ih aiso pas ih totopot.

Ontok pinokinsianan, luyar Chin Tek Ming mokianu tanak tingoligan dau ontokon danda ih ‘minimum’ sabap songulun nakasa koiso.

Idsuang ahal dilo, Upisor Mangadawa Juachim Abel Majanin mantad Koupisan Imigresen mokianu ukuman awagat porotuon kumaa di Lim.

Namot dilo, tolu kusai tulun songkosuaian nontok jiil om pasut mantad kuut kalapas minangakun kisala suminuang pogun diti miampai aiso poomit ih totopot.

Jemal Hanid nojill apat wulan, om ih Marno Eugina om Asrin Victor nojiil limo wulan om pasut.

Iyolo ih dinawa tumanud Seksyen 6 (1) (c) akta iso’i, noilaan minomonsoi do kasalaan dilo ontok 11 Jun om 11 September.

Soira asalasai papanau do ukuman dilo, pokionuon iyolo pootodon doid Koupisan Imigresen montok laang potilombus.

Upisor Mangadawa Insp Lim Swee Beng minaganu laang montok pangadawaan, om toinsanan natandasan au linansanan luyar.