Koonduan manaan tonggungan kiguno
# Kalantaian tinan paganakan toruntud kotundaan pogun- Sapawi
BEAUFORT: Tinan paganakan okon noopo momonsoi timpu tabantalan tulun ngawi, katapi nogi pogun montok koinsasanai om tinimungan koonduan papanau do tonggungan ih kiguno kopio.
Puru Parlimen Sipitang Datuk Sapawi Ahmad id suang ahal dilo mangatag tuh tinan paganakan pogiroton miampai potilombus montok momonsoi iso pogun di kalantoi katanud miampai ’Transformasi Nasional 2050’ (TN50).
“Kalantaian paganakan kiguno montok impoon kotundaan rayat om pogun,” ka disio ontok minanahak boboroson id Abaabayan Tadau Paganakan pinanjur Tinan Kotundaan Koonduan om Paganakan (MPWK) Parlimen Sipitang id Kampung Gerama, hiti di tadau Minggu.
Minoboros isio do tinan paganakan ih torinaon do koonduan obuli kitonggungan sabaagi ejen kotundaan, mantad dilo ino minog do gompion poompus timpu.
Ka disio, tonggungan koonduan sabaagi monorina paganakan agayo kopio tonggungan diolo momonsoi sinakagon ih kaanu sumiliu momuruan pamalapau tiinu.
“Kada do toiso-iso paganakan dilo ‘mogiodu’ toiko ‘pomohokop poriuk ongotilib’ sabap ilo au kaanu momonsoi sinakagon di olidas, katapi osiliu au otoronong, om koidu mantad kootusan ‘Rumahku Syurgaku’ ih osiliu imanimanon potitikid tokou,” ka disio.
Abaabayan Tadau Paganakan dilo nopo nga kopongoputan abaabayan irad dilo ih pinaharo id Kampung Langsat di kawawagu. Mogisusuai abaabayan pinaharo sabaagi ponuangan abaabayan ih tuminimpuun jam 7 kosuabon dilo.
Nokotindapou nogi ih Panakadai Montiri Ponombuluian Koubasanan om Kinoiyonon Posorili ih nogi Adun Lumadan Datuk Kamarlin Ombi dan om Boyoon MPWK Parlimen Sipitang ih nogi Boyoon Konduan Umno Sipitang Datuk Surinam Sadikun.
Sapawi ih nogi Potunud Yayasan Sabah minamarayou karaja ih pinapanau do MPWK om minongomi dilo sabaagi popoburu tagayo laang montok papawakas tonggungan koonduan montok popogirot do tinan paganakan.
Ginatang nogi disio o tonggungan om sokodung tinimungan konduan idsuang kopoluyungan kotundaan.
Ginatang nogi disio o tonggungan, om sokodung tinimungan koonduan kotopong miampai kusai id suang mogisusuai kaganaan kaamung noh pulitik, kotorinaan tulun ginumuan om momonsoi ralan tonudon.
Maganu suntu, piipiro ngaran tagayo tinaru tondu ih kiharo idsuang porinta, noboros di Sapawi do tantu noh do notorimo noh mantad gulu poh gisom baino.
Minoboros isio do koilo o porinta do tinaru koonduan, miirad nogi tinaru kusai, manaan tonggungan di miirad kiguno sabaagi popoburu kotundaan om tambalut kongsi tosonong porinta montok momodimpot ririkoton do kotundaan pogun.
Tumanud Sapawi, toririmo porinta om tumilombus doti minggisom montok papatantu do tinaru koonduan kotilombus monokialit om haro ‘kreativiti’ om ‘inovasi’ di takawas, tuh au oiduanan id suang kaganaan koburuon om kalapas dilo kaanu momogonop miampai tinaru kusai montok mongibit ‘aspirasi’ porinta.
Namot dilo, Kamarlin id boboroson disio minoboros do watas Lumadan doulu noh Kampung Gerama kapaganu nogi mogisusuai kotundaan id suriba porinta.
Idsuang ahal dilo, alansan kopio isio tumilombus rayat monokodung kumaa porinta posodia haro montok kopongoputan agenda kotundaan di napalan noh.
Onu ih papanaon porinta okon ko mimboros waig biis noopo, nga potontuon tokou do kaanu tokou papanau. Ogumu kounalan posodiaon om wookon kagu masaon id bogian koponguhanan ih wonsoyon tumanud kopoguluonan,” ka disio.
Mantad dilo, alansan isio kumaa rayat tuh au muusui-usui laang gugumaga ih mamatos do mogisusuai ahal nga otopot nopo aiso kuasa diolo montok momonsoi do kopiagalan Barisan Nasional (BN) ih kitanda noh mantad solilinaid diti.
Surinam id boboroson disio minoboros do Abaabayan Tadau Paganakan dilo pinaharo sabaagi laang montok popogirot sunduan kapaganakan om koupusan pialatan iso om suai idsuang mogigion songkoiyonon.
Ka disio, tinan paganakan nopo nga harata kigatang kopio om ilo mositi tamangan om poluubon poompus timpu. “Montok popogirot do kapaganakan om popoingkawas do pihubayaan, tonggungan ontok paganakan kiguno kopio om ilo obuli poburuon maya do piturubungan di kiasil om ‘objejtif’ mogiboboros do tulun ngawi tumanud ralan tonudon 1Malaysia,” ka disio.