Pinonipuan kousinan RM1.5 bilion Timpu ponguungan tohu puu pulitik pinotihombus tohu tadau
KOTA KINABALU: Timpu ponguungan nokomoi tohu puu pulitik pinotihombus sohinaid tohu tadau gisom tadau Koiso dumonto.
Majistret Mohd Aizat Abdul Rahim minonoodo koputusan dino kuminaa Huguan Wira Parti Warisan Sabah (Warisan), 43, Huguan Komuhakan Umno Tenom, 43, om Huguan Komuhakan Umno Tawau, 44.
Koinsanai tuhun dino nokomoi tinaan do Tinan Monoina Pomunsaan Susuap Malaysia (SPRM) montok monuhung ponoizukan pinonipuan kousinan tuhun ginumuan montok projik kotundaan habus kakadazan Sabah poguhui tinaan (reman) sohinaid himo tadau ontok 10 Oktober om nopupusan jam 12.50 tanga dau di koniab.
Kotohu-tohu tuhun dino nokomoi soizukon tumanud Seksyen 17 (a) Akta SPRM 2009.
Huguan Wira Warisan hinansanan luyal Martin Tommy, Loretto J Padua, Cedric Choo, Norazmi Alimat, Jaikol Situn om Darell Leiking.
Huguan Komuhakan Umno Tenom hinansanan di Azhier Farhan Arifin, Shahlan Jusri, Arthur Bonnie, Mohd Razali Razi om Jafar Esteben om Luyal Hamid Ismail huminansan Huguan Komuhakan Tawau.
Namot dino, potunud iso komponi panadaan ih tinaan ontok 5 Oktober nakatahib om tinaan (reman) gisom tadau Koonom pinoidu id Kuut Kota Kinabalu kiikila jam 10.05 kosuvabon.
Mohd Aizat pinapabanal disido poiduon miampai jominan SPRM soginumu RM200,000 miampai deposit RM100,000 om duvo panjamin kinoizonon.
Gisom baino SPRM nakapanaan no tuu tuhun montok manakadai ponoizukan kokomoi kes pinonipuan kiikila RM1.5 bilion kousinan ih pinataak maza Komontilian Kobuu’on Habus Kakadazan om Tana (KKLW) piahatan 2009 gisom 2015.
Duvo mantad tuhun ih nataan nakahabus no om himo ih suvai kakaal id ponguungan.