Kota Belud kiharo politeknik ontok 2021
KOTA BELUD: Kiharo dati iso politeknik watas Kota Belud ontok 2021 ih pisosoromo kopongukab kosiwatan lobi alaab montok tinimungan tomulok doulu noh id watas dilo popolombus do balajaran om kaanu nogi popoingkawas do toilalaan idsuang kaganaan ‘teknikal’ om ‘vokasional’.
Montiri id Koupisan Luguan Montiri Datuk Seri Abdul Rahman Dahlan minoboros do Politeknik Kota Belud ih piaga-aga do kigatang RM70 riong dilo wonsoyon dati id Kampung Kesapang id sakai tana kilinaab 12.1 hektar om abaabayan mamabak tana politeknik dilo poburuon dati ontok koimpupuson toun diti.
“Kota Belug (gissom) baino diti aiso poh IPTA (Institusi Pengajian Tinggi Awam) om irad ko noiduanan piagalon watas suai miagal Kota Marudu om Kudat.’Alhamdulillah’, nokopomonsoi noh porinta do kapatantuan montok manahak do poruntukan (montok momonsoi) Politeknik Kota Belud.
“Popoindalan kapaganuan tana masaon papanaon om karaja ngawi pamansaian kapaganu dati timpu kiikira duo gisom tolu toun, om ontok 2021 ointutunan Kota Belud miampai iso politeknik ih doung kawawagu,” ka disio kumaa monunurat abar kalapas minoi intong tapak projik pamansaian ‘institusi’ dilo hiti koniab.
Minoboros Abdul Rahman do pamansaian Politeknik Kota Belud miampai katabayan kopomogonop gisom lobi 1,000 susumikul suai ko osiliu dati do popoinggumu kotundaan kakadaian koduo watas dilo nopo nga wookon laang porinta mogowit kounalan balajaran lobi tosonong montok tanak tomulok Kota Belud.
Kiginumu 500 susumikul torimoon montok pamaganuan koiso soira opongo politeknik dilo tiinu, ka disio. Bernama