Rayat pokionuon mongilag laang kopogowit pioduan tinaru om agama

SANDAKAN: Montok popotilombus do pisompuruan id pogun diti, rayat mositi mongilag tinan mantad momonsoi laang di obuli mogowit doid pioduhan toiko au kopitunud pitinaruan om agama.

Minoboros ih Boyoon Montiri Sabah Tan Sri Musa Aman do onu poh kagu mogiupapakat miampai bogian songkosuaian montok papatarang do ‘ekonomi’ om kaandangan pogun.

“Au tokou apatut mongintong asanang do kogunoon totopot pisompuruan di naanu baino diti, katapi pokionuon tokou montok papaamung om popoluub kagu bibit ngawi pisompuruan om piromutan togirot pialatan toinsanan tinaru ih nokogirot noh solinaid diti,”ka disio ontok pinotimpuun do ‘Karnival Rukun Tetangga’ Bogian Sandakan, hiti koniab.

Minoboros isio do laang popisompuru do rayat mogisusuai suku tinaru, agama om koubasanan montok sumiliu bansa Malaysia okon ko toiso-iso di asanang om obuli podimpoton idsuang timpu di oruhai.

Katapi, ka disio ilo nopo nga iso kopoindalanan tanaru om potilombus ih mokianu do ‘komitmen’ om iman-imanon toinsanan tinan.

Minoboros ih Musa do rayat mositi monongkotoluod sabap kaanu momurimon kopoposion id koyuon di aandang, otoonong om olumaag, nung piagalon miampai pogun suai ih nokotoguang kobolingkaangan.

Ka disio id piipiro pogun pointantu, tikid tadau kotoguang karaaton om au kopitunud, ahal ekonomi om mangasou tinaru ih kopupuson dilo kopomiraag pogun om kontodonon rayat oinggorit om poimpasi sabaagi ponongkusan. -Bernama