69 paratuas watas Kota Belud nokotorimo kapanahakan waig nusapan
KOTA BELUD: Soosomok 69 paratus watas id Kota Belud baino nokotorimo noh kotorinaan kapanahakan waig nusapan, ka di Montiri id Koupisan Luguan Montiri Datuk Seri Abdul Rahman Dahlan.
Isio ih nogi Puru Parlimen Kota Belud minoboros do kinoponorimaan kapanahakan waig id watas dilo baino osodu lobi osonong piagalon 10 toun nakatalib.
“Nakabalanja noh porinta do natusan riong ringgit montok abaabayan monginsonong kotorinaan kapanahakan waig id Kota Belud kaamung noh momonsoi loji waig kawawagu om poposodia do pom suriba tana montok papatantu do kosotolan waig lobi osonong,”ka disio kuminaa monunurat abar kalapas minoi intong karaja ngawi paparalom do Bawang Tempasuk doros Kampung Bobot, id timpu kakapan karaja hiti koniab.
Nokotindapou nogi ih Panakadai Montiri Pomutanaman om Pomorunan Taakanan Sabah Datuk Musbah Jamli ih nogi Puru Lamin Koundangan Pogun Tempasuk om Upisor Watas Kota Belud Abdul Gari Itam.
Kokomoi karaja ngawi paparalom bawang, noboros di Abdul Rahman do ilo nopo nga koluyungan montok papatantu do koluyungan bawang osonong om kaanu nogi mongingkudi do kobolingkangan liud id watas dilo.
Minoboros isio do nokopongobi noh porinta do kiikira RM80 riong montok karaja ngawi paparalom do Bawang Kadamaian om Bawang Gurung-Gurung.
Minongomi potilombus, minoboros Abdul Rahman do porinta miampai misokodung koupisan om agensi kikompitan id watas dilo nogi maganu piipiro laang kaamung noh momonsoi pangantaban liud om koluyungan lumabus waig montok mongorulan do kobolingkangan liud.
Tumanud disio, koinsaruan kobolingkangan liud id Kota Belug antakan kalapas kinantakan guminuyu tana nokoimamang Ranau ontok 2015 nakatalib sumusuhut ratusan noribu tan togis, watu om susuai poh lumuyung doid kosondoton gisom kontodonon do bawang id watas dilo ongoribau suai ko koluyungan waig bawang au osonong.
Id suang timpu kakapan karaja dilo, kuminakap nogi ih Abdul Rahman do tapak pamansaian Politeknik Kota Belud; tapak naamot tomu mingguan om tapak Projek Pomulaminan Rayat id Kampung Pirasan. -Bernama