Pinongusutan kousinan RM1.5 bilion: Logoson SPRM papanau ponoriukan
BONGAWAN: Patahakon kumaa Tinan Monorina Pomunsaan Susuap Malaysia (SPRM) papanau do ponoriukan om tingkodan monondos kumaa parti momorinta kaaka do nokoompit minomoyoon dilo.
Irad dilo boros di Montiri Labus Datuk Seri Anifah Aman ontok pinokianu minongomi panandasan gugumaga kaaka do timpu pinanahanan ih winonsoi SPRM ontok papanau karaja id Sabah mantad podi piipiro tadau nakatalib kiwongi pulitik.
“Pinanahanan diolo diti okon pinalan toiko winonsoiwonsoi sabap ilo nopo nga ruputan mantad rayat dilo sondiri om okon ko mantad tulun pulitik.
“Au oku karati onu ih sorohon gugumaga. Pinanahanan dilo aiso wongi pulitik, om panandasan kaaka do parti momorinta nokoompit nopo nga au otopot kopio,” ka disio.
Rinuba isio di monunurat abar kalapas minoi intong piipiro walai ih nangaraag nosugi tongus id Kampung Lanas, hiti di tadau Koonom.
Kinoruhang nogi isio di Puru Lamin Koundangan Pogun (ADUN) Bongawan Datuk Mohamad Alamin.
Anifah ih nogi Puru Parlimen Kimanis minoboros do SPRM sabaagi agensi porinta ih osimbayan papanau do kuasa pinatanggung om toinsanan tinan mositi manahak liwang om kotumbayanan kumaa diolo.
Ontok timpu iso’i, iyolo ih linohou montok monulung ponoriukan kangaam kopio manahak pisokodungan miampai tososonong.
“Logoso noh kopoindalanan undang-undang dilo pantangon.Nung au kasala kada korosiai. Ponoriukan nga kakaal papanaon mantad dilo, tonudo noh undangundang id pogun diti om onuai noh sokodung kumaa SPRM,” ka disio.
Gisom baino, turu tulun tinaan SPRM id Kota Kinabalu, Putrajaya om Tawau kokomoi do ponoriukan kokomoi projik labus kakadaian id Sabah mantad Komontirian Koburuon Labus Kakadaian om Watas (KKLW).
Wookon ih nataan nopo nga momuruan parti gugumaga, om wookon kagu momuruan parti momorinta, upisor porinta om kuntirikto.
Boyoon Tinan Monorina SPRM Tan Sri Dzulkifli Ahmad pinoruput minoboros do bogian dau baino diti manahak pongintangan papanau do ponoriukan id Sabah lobi pogulu kikoompitan projik id suriba KKLW pogului tumingan pogun suai.
Tumanud dau, gisom baino diti kiginumu 45 saksi linohou montok monulung ponoriukan kokomoi kes pinongusutan kousinan KKLW id pogun diti.
Noboros nogi disio do au momili wulu o bogian dau idsuang ponoriukan kes dilo sabap kapangagakaman okon montok parti gugumaga noopo, katapi nogi mongintong do parti Umno.
Minggu nakatalib, Kumoduo Luguan Montiri Ahmad Zahid Hamidi minogolim nogi pinanahanan momuruan parti gugumaga id ‘operasi anti’ susuap nokomoi KKLW id Sabah kiwongi pulitik.