Toinsanan watas mositi haro Tadika Jheains ontok 2025

KOTA KINABALU: Tadika Koupisan Ahal Agama Silam Pogun Sabah (Jheains) mositi haro id pointongkop watas ontok

2025.

Panakadai Montiri Doid Boyoon Montiri Datuk Mohd Arifin Mohd Arif minoboros do idsuang timpu limo gisom 10 toun rumikot, ginumu tadika Jheains mositi tambaan.

Laang dilo ka disido montok momogonop kogunoon tulun ngawi ih maid-laid momili tadika Jheains.

“Gisom baino diti, Jheains haro kiginumu

13 tadika noopo om ino au kopoompit toinsanan watas.

“Tadika posodia haro kaamung no id Beaufort, Sipitang, Tuaran, Tamparuli, Paparom nogi Kota Kinabalu,” ka disio.

Noboros disio ahal dilo kumaa monunurat abar kalapas pinotimpuun do abaabayan Graduasi Tadika Jheains Nayatan Pogun Sabah 2017 hiti koniab.

Minoboros Arifin do tadika Jheains maid-laid kapaganu tampat id ginawo tulun ngawi sabap ilo kopoompit do kurikulum mambasa, mangaji om akademik.

Suai ko ilo ka disio, sikul pironitan nogi kaanu pongintongan mantad tinimungan molohing.

Idsuang ahal dilo, pokionuon nogi disio mooi do kaanu Jheains momoruhang ginumu sikul pisompuruan.

Tumanud dau, atag timpuuni pomoruhangan sikul pisompuruan (integrasi) wonsoyon id Sikul Agama Pogun (SAN) Sembulan ontok toun tabantalan.

“Sundung pia koporijistaran doid sikul pisompuruan momoguno do tokuudi pambaraian, nga molohing kakaal orohian poporijistor tanak ngawi doid sikul diti.

“Suai pointalangon miampai ilimu akademik om agama, susumikul ngawi hiti id sikul pisompuruan nogi obuli minsingilo kaganaan tahfiz,” ka dau.

ARIFIN (duwo gibang) papatahak do sijil kumaa songulun mantad susumikul Tadika Jheains id abaabayan dilo.

SUSUMIKUL ngawi Tadika Jheains ih uminampai do abaabayan ‘graduasi’ minokigambar kaandaman songowian Ariffin (poirikau id tanga) om tombului nalapan suai.