SM St. Michael nokoponuat likud insan po vagu id MBOR
PENAMPANG: Sikul Pintangaan (SM) St Michael insan po vagu minonuat ngaan id ‘The Malaysian Book Of Record’ (MBOR) songian nakaanu minonumung soginumu 42,617 buuk nakahaid.
Montili Sains, Teknologi om Inovasi (Mosti) Datuk Seri Panglima Wilfred Madius Tangau minoboos do kinodimpotan ih tinoodo di sikul dino nopo nga montok ko-7 om kosudong dodizon pomitanan di saavi-avi sikul id posoihi uvang diti.
“Pinoiho zou do projik MBOR pouhanon tikid toun id sikul diti om kovosian pinonguhanan timpu diti nga ‘kolaborasasi’ songowian Koisaan Mohoing om Mongingia (PIBG) om boogizan SM St Michael.
“Idea diti nogi nokoimbuhai miampai kivaa o kogunoon montok monuvang okuangan ginumu buuk ngavi ih kivaa idsuang hongkod kotos sikul,” ka disido ontok pinotimpuun do Projek Koleksi Buuk Haid Poingguugumu MBOR 2017 doiti koniab.
Teks pason disido binasa di Poniikon Barisan Nasional (BN) Penampang Datuk Donald Peter Mojuntin.
Minoboos Madius do ontok timpuunon nogi mokiikot o bogizan sikul do soginumu 36,000 tinan buuk haid nga kinootuson dino nakaanu minomodimpot hobi mantad pokiikotan timpuunon nogi.
Ka disido projik ih tuminimpuun ontok Jun nakatahib ponokotanda do pinonimungan buuk ngavi nakahaid idsuang timpu toduuk kopokionu do kalaja om komitmen poimponu mantad saavi-avi boogizan.
“Mimang au ohimon do buuk ngavi diti papanau do tonggungan kiguno montok popoimbuhai tuhun ngavi kikoubasanan toihahaan.
“Koubasanan mambasa kiguno kozo montok popomiho do sosonguhn susumikul dino adadi tuhun kiguno ih kitoihaan om kipomusaavan takavas,” ka disido.
Namot dino, Mohoingon PIBG SM St Michael Datuk Philip Lasimbang minoboos do kapaagatan om kaazan ih notoimo di sikul dino adadi iso mantad koubasanan kiguno.
Ka disido projik dino nogi kopoompit do soginumu 1000 tuhun kaamung no susumikul, mongingia, mohoing, bagas susumikul om komuniti.
“Piahatan kavo buu ih nakaanu minonimung nopo nga id okitonan ‘fiksyen’ om okon ‘fiksyen’ miaga buuk pongintongan, basaan ilmiah, podtuongisan, jurnal om susuvai po,” ka disido.
Nokotindapou nogi id abaabazan dino nga ih Mohoingon Sikul SM St Michael Jennifer Asing, hansanon mantad MBOR Muhammad Shukri Hairon Nahar om tombuhui tapantang ih susuvai.