Pulis minanaan tohu kusai minamabak suminuvang kadai serbaguna
TAWAU: Pulis minanaan tohu tuhun kusai songkosodop kahapas kikotumbazaan do minamabak suminuvang iso kadai serbaguna id Taman Sri Balung doos doiti di tadau Kaapat nakatahib.
Ontok 9 November nakatahib, mananakadai kadai minonoodo luputan kahapas nokoiho do kadai touki dau binabak sinuvang id jam 8.30 kosuvabon om piahatan balang ih natagak id kadai dino kaamung no iso pati bosi kisuvang usin asil dagang piaga-aga do kiginumu RM11,000.
Huguan Pulis Uvang Tawau, ACP Fadil Marsus minoboos do sumusuut dino suspek koiso kiumul 24 toun tinaan id tiizonon dau id Flat Taman Sri Balung kiikila jam 3.30 minsusuvab songkosodop.
“Na’au nogi pulis do mogikaakavo balangan di pinanakau kaamung no duvo set pomusing skru om 13 set LED autolamps, om nogi sakaping kalatas kikotumbazaan palan hinominon kadai, usin tunui RM1.025 om pati bosi ih vinosu kitukuan 24cmX17cm,” ka disido id kopoihaan doiti, koniab.
Sumusuut kinagakaman koiso, ka disido suspek koduvo om kotohu ih kiumul 28 om 20 toun, tinaan id sosodopon songkosodop, songuhun id doumbangan iso kadai om songuhun vagu tinaan id Flat Taman Sawit Balung.
“Na’au nogi pulis o usin tunui soginumu RM7,147 om kulita Proton Iswara Aeroback ih pinohosok id iso hamin suvai id Lahan Apas Balung,” ka disido om minanamba do suspek koiso kivaa likud koimaan haid nga kotohutohu suspek ‘nagetif dadah’.
Minoboos zi Fadil do mozo kointahangan timpuuni koinsanai suspek minangakun nokoompit kes mamabak kadai dino om tinaan tumanud Seksyen 117 Kanun Prosedur Jenayah tumimpuun baino (koniab) gisom 15 November montok ponoizukan potihombus. -Bernama