Tulun songkosuaian minogowit lumabus aiso kasagaan tumau petrol tinaan APMM
KUDAT: Songulun kusai tulun Filipina ih minogowit kiginumu 2,130 liter tumau petrol kikotumbayaan do asil minogowit lumosok lumabus tinaan do Agensi Popogirotkuasa Maritim Malaysia (APMM) hiti.
Potunud Maritim Watas Kudat Leftenan Komander Maritim Boon Chin Chau minoboros do koinsanai tumau petrol dilo sinuangan id suang 71 tong miampai kopongorumpos 30 liter potitikid tong.
Tumanud dau, suspek tinaan kiikira jam 1 minsusuab tadau Koonom maya ‘Ops Pluto Timur’ id 0.6 Batu Nautika mantad Tanjung Berungus doros hiti.
“Kusai dino kiumur 67 toun om aiso nunuunu surat pongintutunan tian di totopot.
“Suspek tinaan miampai iso bot enjin sangkut ih kikotumbayaan do owiton daa lumabus miampai lumisok om aiso surat kabanaran totopot mantad Komontirian Padagangan Suang Pogun, Koperasi om Kopomogunaan (KPDNKK).
“Maya operasi dilo, nakaanu tokou minongilo bot suspek id koyuon mosi-rosi kiikira jam `12.45 tanga sodop,” ka dau id kopoilaan hiti koniab.
Minoboros isio do asil pinomorisaan nokoilo do bot dino nokomoi aiso numbur koporijistaran.
Minoboros isio do koinsanai barang pinamahauan kaamung noh bot om enjin kawo Yamaha 40 HP piagaaga do kigatang RM18,920.30.
Tumanud dau suspek soriukon tumanud Seksyen 6 (1) (c) Akta Imigresen 1959/63 sabap suminuang om miyon id Malaysia aiso pas toiko poomit ih otopot.
Suai ko ilo ka dau, papanaon nogi ponoriukan dilo id suriba Enakmen Lolokiton om Dermaga Sabah (2002) (Polisinin Kapal Tokoodo 2008) sabap pinapanau bot aiso lisin om id suriba Akta Tamangan Kapanaakan 1961 sabap minogowit barang tamangan aiso kinasagaan mantad KPDNKK.
“Bot dilo nowit suminuang doid Jeti Awam Kudat montok pomorisaan potilombus om patahakon doid Unit Ponoriukan Maritim Kudat.
“Nunu noopo kaparagatan ih wonsoyon do bot ngawi mositi do tumanud kooturan ngawi totopot lisin ih pinalabus do bogian monguasa.
“Toririmo Maritim Malaysia popoingkawas do pongintongan om pimpanaan montok mongipop poimponu kaparagatan ih kadandang do undang-undang id daat,” ka disio.
Minoboros isio do nung kiharo nunu noopo kopoilaan kaparagatan ih kadandang do undang-undang id daat toiko kaagaban obuli rumomut miampai APMM id koluyungan 24 jam ilo nopo nga maya MERS 999 toiko Longkod Operasi Watas Maritim Kudat 088-611857/ 58.