JBPM papanau 91 projik momonsoi kawagu om monginsonong lamin 2017
KOTA KINABALU: Koupisan Bomba om Mongumolig Malaysia (JBPM) papanau do 91 projik pamansaian kawagu lamin notutudan toiko lamin naraag om projik monginsonong lamin naraag om nakalaid noh id pointongkop pogun toun diti id suriba abaabayan Strategi Lautan Biru Kebangsaan Ke-7 (NBOS7).
Kumoduo Boyoon Potunud (Kotundaan) JBPM Datuk Amer Yusof minoboros do mantad ginumu dilo, 44 nopo nga projik momonsoi kawagu lamin notutudan om naraag om lobi dilo 47 projik kagu nopo nga monginsonong lamin naraag om nakalaidnoh.
Ka dau projik pamansaian kawagu dino nokomoi kopoompit do balanja kiikira RM1.83 riong om projik monginsonong lamin nopo nga kopoompit do balanja RM639,000.
“Montok pogun Sabah noopo, nokopomonsoi noh JBPM do kiginumu 15 unit lamin mantad podi 2012 kaamung noh tolu projik ontok toun diti miampai kos RM40,000 iso,” ka dau ontok minanahak boboroson id abaabayan kapanahakan kunsi lamin Projik Pamansaian Kawagu Lamin NBOS7 id Kampung Sri Pandan, Putatan koniab.
Abaabayan dilo pinotimpuun di Kumoduo Boyoon Montiri Sabah ih nogi Puru Lamin Koundangan Pogun (ADUN) bogian Petagas Datuk Seri Yahya Hussin. Id abaabayan dilo, munggui kinotutudan Mohd Tamrin Supit di Kampung Sri Pandan nokotorimo kunsi lamin wagu disio.
TumanudAmerpoompuskinopoompitan JBPM id abaabayan ‘NBOS House Build’ dilo pialatan toun 2012 gisom 2017, 180 unit lamin nopongo noh minomonsoi kawagu om 139 lamin kagu numbosian om toluod agensi dino nokomoi nakaanu husi tosonong mantad tinimungan ih noimangan kaantakan au osonong.
“Sundung pia mantad kawo ginumu lamin ih winonsoi au osongkuro agayo, nga montok dagai id JBPM kopuriman do ilo kirati kopio montok ponokotanda do kikosianan agensi porinta montok moningolig om monulung rayat di osusa doulu noh tinimungan okurang kamampuan,” ka dau.
Pinosorou nogi di Amer o tulun ngawi tuh toririmo maganu laang miingat-ingat kokomoi ahal koumoligan kotutudan sabap kolowongon om olunggui kokomoi ahal dilo asaru osiliu kontodonon doid atagakan niawa om harata kakamot.
Namot dilo, Yahya ih nogi Montiri Pomutanaman om Pomorunan Taakanan Sabah monongkotoluod kumaa toluod JBPM om alansan kopio abaabayan NBOS dilo potilombuson sabap ilo kaanu manahak asil kirati kumaa tinimungan okurang kamampuan. -Bernama