Tinan Komulakan om Koonduan papatantu kopolombusan PBS - Ongkili
KOTA KINABALU: Kumoduo Porosiden Parti Bersatu Sabah (PBS) Satuk Seri Dr Maximus Ongkili minoboros do tinan Komulakan om Koonduan parti dilo nopo nga gamut om osiliu popoburu tagayo montok papatantu do kopolombusan do parti dilo.
Ongkili, ih baino diti papanau do karaja ngawi porosiden parti dilo, minoboros do asanang araag o PBS nung aiso kosompuruan idsuang goduwo-duwo palapa dilo.
“Kagarasan toiso-iso parti nopo nga koisaan id pialatan toinsanan puru om ih kiguno kopio nopo nga kosompuruan mantad Komulakan om Koonduan. Nung aiso goduwo-duwo palapa (Komulakan om Koonduan) dino nokomoi, PBS irad ko tombolog di au kotulud.
“Goduwo-duwo palapa diti kiguno kopio montok papatantu do kaadangan PBS,omnogipapatantudoPBSkotilombus ‘relevan’,” ka dau ontok pinotimpuun do Pitimbungakan Tinan Komulakan om Koonduan PBS kopinamot Kongres PBS Ko-32 hiti koniab.
Minoboros Ongkili do montok papatantu do PBS kotilombus lumaang doid tigulu, goduo-duwo palapa parti dilo mositi toririmo monulung montok momusorou do poingkuro montok papatantu PBS kotilombus ‘relevan’ idsuang koluyungan kotundaan di awakas ontok timpu diti.
“Toinsanan puru parti mositi papanau do tonggungan di lobi awakas om opurokis montok mamagayat kaanangan tinimungan tomulok umampai padamaan PBS. Momoguno tokou do pomuhabaan wagu montok popotilombus do kopomuruanan PBS.
“Mantad dilo, mositi lobi aparagat tokou montok mindahu gana om rumuba miampai tinimungan tomulok. Angatai om posuango noh sinakgon tomulok ngawi doulu noh iyolo ih kotoboi om asaga mindaama songowian ngawi PBS montok popindaama do ‘hakhak’ Sabah, suai ko papagaras do palapa Komulakan om Koonduan miampai nuludan kopomuruanan di ‘komited’ om ‘dinamik’,”ka disio.
Ontok timpu iso’i, Ongkili ih nogi Montiri Winakas, Teknologi Otomou om Waig, minoboros do montok tumoguang do pomilian tagayo timpu rumikot, toinsanan parti id toinsanan bogian mositi monulung calon Barisan Nasional (BN) ih monokisaap id watas dilo.
“Kinalantaian tokou solinaid diti nopo nga ‘berkat’ pisokodungan tambalut ngawi tokou mantad parti pikoruhangan BN ih minonulung nogi pinopotopot do imanimanon om padamaan tokou. Mantad dilo, kiguno kopio do mogisosokodung tokou miampai parti ngawi pikoruhangan montok papatantu do toinsanan tirikohon ih sinaap do PBS kamanang,” ka dau.
Pinosorou nogi disio o toinsanan bogian om raan PBS mooi popogirot parti miampai papatantu do bogian sompori-pori oulud suai ko injin parti toririmo aparagat om kamampu manangkis ponokialitan.
“Ih kiguno kopio, kada do haro puru parti ih tutumanud toiko agayat miampai gugumaga. Manahak tokou pongintongan karaja noopo montok kotilombus papagaras PBS, ih ponogi parti kinoiyonon pointutuwo id Sabah,” ka disio. -Bernama