Molohing pokionuon monulung mongingia popoingkawas do kangai-angaian tosonong pambalajaran tangaanak
Bantu guru tingkatkan kualiti pembelajaran anak KOTA MARUDU: Pokionuon di Kumoduo Ponorikohon Tinan Koburuon Tana Pogun Sabah (LKTNS) Datuk Wetrom@Mohd. Fikri Bahanda o molohing ngawi om mongingia mooi do tumilombus misokodung, misompuru popoingkawas do kangai-angaian tosonong pambalajaran tanak ngawi id sikulan sompori-pori.
Ka disio, balajaran tanak ngawi mantad nayatan suriba diti momoguno kopio pisokodungan mantad mogisusuai tinan doulu noh mantad molohing om mongingia montok papalantoi do gaab songowian id pialatan mongingia om molohing ih muhang mintong tanak ngawi kapaganu do kalantaian di tosonong om kopongunsikou kopio maya potitikid mato balajaran di nabalajaran.
Tumanud disio, tanak ngawi tongokoodo tokou nopo nga harata kotos tulun di kiguno kopio doid kopotundaan om timpu tabantalan bansa ompogun.
Ka dau, ilimu ih tosonong kopotounda do sinakagon di kipadamaan, kipomusarahan tolidas om kitoilalaan.
Mantad dilo, mongingia ogumu toilalaan idsuang kaganaan pambalajaran montok patahakon kumaa tanak ngawi ih tinudukan diolo om tantu noh do ounsikou kopio o molohing maya kinalantaian tanak ngawi diolo mantad nayatan ‘prasikul’ gisom nakaawi ponginabasan id siul tosuriba montok mongoput balajaran doid sikul pintangaan om kalapas dilo kotilombus doid nayatan di lobi takawas.
Kawagu dau, molohing papanau do tonggungan kiguno kumaa tanak ngawi ontok kiharo id lamin montok mongintong pambalajaran tanak ngawi diolo om mongunsub mantad umampai do pilongotan osimbayan ih kapangalap do kobolingkangan di au osonong.
Pokionuon ku mooi do molohing om susumikul manahak do pisokodungan poimponu kumaa mongingia diolo montok papawakas do kaganaan pambalajaran mantad timpu doid iso timpu,” ka disio.
Wetrom ih nogi Boyoon Umno Bogian Kota Marudu pialatan suai minoboros ahal irad dilo id Abaabayan Konvokesyen Prasekolah Komontirian Balajaran Malaysia Nayatan Watas Kota Marudu 2017 id Dewan Komuniti, di sini Jumaat.
Kiginumu lobi 500 tulun susumikul ‘prasikul’ mantad SK. Sunsui, Popok, Timbang Batu, SK. Ranau, Tumunda Salimandut, Kota Marudu II, SK. Gana, Tandek, Panaitan, Tagaroh, Ongkilan, Tanjung Batu, Taritipan, Masalog, Mangin, Bintasan, Lampada, Simpangan, Koromoko, Talantang, Langkon om SK. Tigaman nokotorimo sijil nakaawi ‘prasikul’ om mongoput koposikulan Toun 1 2018 id sikulan sompori-pori.
Minonoluod nogi ih Wetrom do kiginumu RM5,000 montok Abaabayan Prasikul Watas Kota Marudu.
Nokotindapou nogi id abaabayan dilo nga Guru Besar SK Kota Marudu II ih ponogi Ponorikohon Panganjur Abdul Rahman Haji Odis, Guru Besar SK. Tagaroh ih ponogi kumoduwo ponorikohon panganjur Hajjah Adiah Mustapha, Guru Besar Guru Besar sikul kabansaan id watas Kota Marudu om Monunurat Umno Bogian Emran Maidin minomuruan Tinan NGO Kota Marudu.