KYS nokotorimo dividen RM204.9 riong
KOTA KINABALU: Kiginumu 13 tanak komponi om komponi misompuru Tinimungan Yayasan Sabah (KYS) pinapatahak do ‘dividen’ kigatang RM204.9 riong kuminaa Tinimungan Yayasan Sabah montok timpu kousinan 2016 om 2017.
Komponi dino nokomoi nga Innoprise International Inc., Tanjong Aru Hotel Sdn. Bhd., Awan Inspirasi Holdings Sdn. Bhd., Hap Seng Plantations Holdings Berhad, Shell Timur Sdn. Bhd., NRG Consortium (Sabah) Sdn. Bhd., Sabah Softwoods Berhad, Innoprise Plantations Berhad, Benta Wawasan Sdn. Bhd., Norsechem (Sabah) Sdn. Bhd., Innovision (PNG) Pty. Ltd., Borneo Nature Tours Sdn. Bhd. om Innoprise Jungle Lodge Sdn. Bhd.
Dividen dino pinatahak kuminaa Potunud Yayasan Sabah, Datuk Sapawi Haji Ahmad id Abaabayan Kapanahakan Dividen, ih pinaharo id iso hotel hiti koniab.
Abaabayan dilo sinaasi di Boyoon Montiri Sabah, Tan Sri Musa Haji Aman ih nogi Ponorikohon Poingigit Amanah Yayasan Sabah.
Id pason disio, monongkotoluod isio kumaa toinsanan komponi pointantu sabap kinangaian kousinan di tosonong om nokodimpot ‘Indeks Prestasi Utama’ (KPI) montok toun 2016 om 2017.
Idsuang ahal dilo, alansan kopio isio do kalantaian kotilombus aanu momodimpot om poposotol do kinoingkawasan kinoulian di ‘optimum’ montok poingigit papaapu sabah.
“KPI mositi poingkawason miampai lobi tosonong montok papatantu do komponi ngawi kotilombus popokito do kangai-angaian tosonong om kapanahak toluod kousinan miampai kirati kumaa Tinimungan Yayasan Sabah tuh tatap ‘relevan’ okon noopo kumaa Tinimungan yayasan Sabah, katapi nogi kumaa rayat om Pogun Sabah.
“Kinalantaian koinsasanai potitikid komponi pinatantu mantad katabaian komponi dio miampai ‘konsisten’ popoingkawas do kountungan, popoingkawas do gatang poingigit saham om papanau do laang tosonong kosunion di kopongunsub kopio,” ka disio.
Tumanud disio, kinoingkawasan kountungan kirati do asil dividen lobi akawas kumaa Tinimungan Yayasan Sabah montok papasanang diolo momogonop ‘komitmen’ id suang ‘objektif korporat’ diolo.
“Ino montok momoruhang om momogonop do karaja om pinggisaman porinta mogowit koburuon ‘sosioekonomi’ om kotoonongan montok rayat pogun diti,” ka dau.