Boros Kadazandusun apatut haro linominon sondiri pamansayan do surat kabar

ID

pogun Malaysia nopo nga haro onom boros ii naramit do porinta koponontudukan do poia’on (potudukon) id sikulan porinta. Boros ngawi dino kaampai no boros English, boros Singkung (Mandarin), boros Aemaelaekaetae (Tamil), boros Iban om boros Kadazandusun.

Baino diti tu naramit no do

Porinta Koponontudukan Malaysia (Malaysia Ministry of Education) o BKD do potudukon id sikulan porinta, ogumu susumikul di minog onuan do raporapo (materials) basaon miagal ko buuk, surat abar om susuai po.

Id pogun diti do baino, BKD aiso po surat abar di dau sondiri do goguan om papanahon. Do naamot diti, sumikib noopo di BKD do bolikon surat abar do kompeni suai ii tinuridong do tulun Sina om tulun Malaya om bolikon dino au daa kouma do ponuratan do nunu nopo ii milo posuraton do monunurat BKD ii kaampai no sinuratan basaan do tangaanak sikul, mongingia om monunurat poimbida.

Mantad dino, kogunoon tagayo do kiharo pamansayan surat abar ii doung Kadazandusun sondii. Nung haro nopo daa, kosogoi daa tutok toinsanan tulun Kadazandusun do papalabus nunu ii nosingilaan, noumbalan, noondom, nopurimanan, nosorou om noinipi diolo id boros tinaru sondii ii au minog do abasa dilo tinaru suai. Mantad dino do kiharo di kosimbayanan (freedom) atus paratus tulun Kadazandusun do momoguno boros tinaru sondiri. Kopomogunaan do boros tinaru sondiri dino milo popotimporon do sontob naangayan id pomusarahan do tulun Kadazandusun.

Pamansayan Surat abar Kadazandusun dino nopo nga ogonop kiharo monunurat BKD sondiri ii poingkaraja poimponu timpu (fulltime reporters) om haro nogi ii poingkaraja au poimponu timpu (freelancers). Koupisan pamansayan surat abar Kadazandusun dino papaharo pingludaan monurat om manahak kosiwatan do tulun Kadazandusun do umampai id pingludaan monurat dino.

Nung aiso linaging toi ko impohon do tulun Kadazandusun do mogiturubung tutok, au milo tulun Kadazandusun do poturidong do tinaru di agaras id amung dilo tinaru tangagayo. Nung koimagon daa o kopomogunaan do BKD id pogun diti, milo nodi daa tulun Kadazandusun do mokianu pongimuan (allocation) porinta poposurat boros kopoilaan (on sign boards) ii kaampai no ngaran ngawi kinoyonon (residences), ralan (streets) om kinaantakan (events) om ngaran tulun Kadazandusun kingaran om poimbida (names of prominent Kadazandusun people). Ngaran dino poguluonon (ayat id sawat) do poposurat om susuhuton do boros English om BM nogi.

Sontob abaabayan ii pohoroon id linaging miagal ko sugandoi, unduk ngadau, koponondigan tadau Tagayo Kaamatan toi ko Tadau Piangayan om Tadau Kinosusuon om susuai po, minog kopio do uludon om poindalanon do poimponu ngawi abaabayan dino id BKD. Tulun di mongunguhud abaabayan dino nopo nga poingalib kosudong mantad do mongingia ii abaal om potimporon o pokimamaan do mamasi boros tinaru.

Id walai pangarayahan do Minamangun om Gampamasi id labus kakadayan nogi nga minog kopio do uludon id BKD tu hino no o kotimungon do tulun togumu Kadazandusun. Ii manahak ponontudukan mantad Buuk Kinorohingan ii nalap mantad labus pogun, minog do dolinon ii boroson (ponudukan) dau id BKD. Tulun Kadazandusun di abaal toilaan BKD no kosudong do alapon do papadalin.

Boroson (text) di polombuson do tulun Kadazandusun ii kirongod (ranking Kadazandusun people) id linaging pokinangahan minog daa do id BKD do poimponu. Text dino kiharo songulun ii baalan do monurat montok di tulun popolombus dino. Ii tulun popolombus dino nga mositi no daa do otootopot do koilo om oupus do BKD.

Nung milo tulun Kadazandusun momonsoi do koinsanai dilo narait id sawat, intangan tokou daa nung nunu kootuson do kopomogunaan BKD id timpu opod toi ko duo noopod toun (toun 2027-2037) mantad baino.