Musa: Huminodun laang koponimpuunan kopomogompian koubasanan tulun sandad
Huminodun langkah permulaan pemeliharaan kebudayaan orang asal
KOTA KINABALU: Kapangalabusan filem Huminodun nopo nga iso laang koponimpuunan montok papatantu do kopomogompian tungkusan kaadat-adaton tulun sandad id Sabah.
Minoboros ih Boyoon Montiri Tan Sri Musa Haji Aman do pogului diti au insan haro filem ih pinokitonan momoguno do boros Kadazan.
“Filem diti nopo nga laang koponimpuunan montok piopuan songowian mongingintong ngawi kokomoi do kobilangan kointutunan om boros tulun sandad id Sabah.
“Atagakan tokou doti do toilalaan, kointutunan om koubasanan sokiro ko aiso laang montok momogompi om moningolig do kobilangan dilo,” ka dau ontok pnotimpuun do pinoimaganan Tayangan Perdana Filem Huminodun, hiti konihab.
Teks pason dau binasa di Kumoduwo Boyoon Montiri Tan Sri Joseph Pairin Kitingan.
Narayou di Musa o laang ih winonsoi montok papalabus do filem irad dilo suai ko manahak do kosiwatan kumaa kobulihan lakunan kinoiyonon koburu.
Ka dau, koporintaan pogun mongilo do pomorunan ‘kreatif’ nopo nga iso kaganaan kotundaan di kiguno.
“Pomorunan irad dilo otopot kopio kaanu popotounda ekonomi toiso-iso pogun miagal Korea Selatan om New Zealand.
“Abaabaayn ih pohoroon okon kopoimaganan noopo, katapi nopo nga abaabayan montok kapaganu do kousinan pomirukutan montok popotounda do kaganaan boros om poposodia do sikulasip kumaa susumikul tulun sandad Sabah ontok popolombus do balajaran id nayatan universiti,” ka dau.
Namot dilo, Pairin ontok romuto minoboros do bogian KDCA toririmo misokodung om mongukab kosiwatan kumaa kointutunan suku tinaru suai ih muhang umampai kaganaan filem doulu noh montok popointutun om popoingkawas do boros om koubasanan sompori-pori.
“Filem ih pinotimpuun baino diti nogi kopongukab kosiwatan tagayo kumaa tulun Sabah umampai kaganaan dilo.
“Ino nogi koponupu doti do kosiwatan pakarajaan suai ko gumura katanud miampai ‘Revolusi Perindustrian Keempat’ (Industri 4.0),” ka dau.
Nokotindapou nogi id abaabayan dilo nga Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun, Montiri Komunikasi dan Multimedia Datuk Seri Panglima Dr Salleh Said Keruak, Papalabus om Potunud Filem Filem Huminodun Jo Luping om Aaron Cowan om nogi tombului tapantang ih suai.