Karamaian Krismas Manggatal kaharo 8-10 Disember
KOTA KINABALU: Dewan Bandaraya Kota Kinabalu (DBKK) om Majlis Gereja-Gereja Manggatal (MGGM) insan poh kagu misokodung manganjur do Karamaian Krismas Manggatal ontok 8 gisom 10 Disember diti, id Dewan Masyarakat Manggatal om Padang Mimbuul Kakadaian Manggatal.
Mogisusuai abaabayan kagayat pinosodia kaamung noh pokitonan pantas mantad mogisusuai gereja id posorili Manggatal om pinongolumisan Krismas ih papanawau do Kakadaian Manggatal. Pokitonan poimbida susumikul sompomogunan Universiti Malaysia Sabah (UMS) mantad Timor-Leste posodia nogi paparamai do abaabayan koponimpuunan om koponutuban karamaian diti.
Abaabayan koponimpuunan kopongukaban Karamaian Krismas potimpuunon doti di Mayor Bandaraya Kota Kinabalu Datuk Yeo Boon Hai ontok 8 Disember tumimpuun jam 6 sosodopon om abaabayan koponutuban nopo nga potimpuunon di Montiri Sains, Teknologi om Inovasi Datuk Seri Panglima Wilfred Madius Tangau ontok 10 Disember tumimpuun jam 8 kosuabon.
Miagal toun-toun di nakatalib, gaab tagayo panganjuran karamaian diti nopo nga montok mamaramai kagu pangaramitan Krismas kumaa tulun ngawi Kristian id bogian Manggatal, popogirot do kolumaagan om piunungan id pialatan mogigion ngawi Manggatal om koinsanai rayat Manggatal.
Tulu ontok toun diti, ‘Haro Krismas Sabap Yesus’, poposotol do koponorimaan rati Krismas kumaa tulun ngawi Kristian om popoluub kagu koulalahon piunungan, pihubayaan om pisompuruan id pialatan tulun ngawi ih mogisusuai bansa om agama id Sabah.
Karamaian kumo-onom diti popokito do duwo kosuaian tagayo piagalon karamaian di nakatalib. Montok kumoinsan nogi, kaharo abaabayan sipoot rayat ontok 9 Disember tumimpuun jam 7 kosuabon gisom 4 sosodopon id Padang Mimbuul Kakadaian Manggatal.
Iman-imanon tagayo sipoot rayat diti nopo nga montok mamaramai do pangaramitan Krismas Manggatal om nogi popogirot do kolumaagan, sunduan kapaganakan om pisokodungan id pialatan tulun ngawi om bogian monguasa kinoiyonon.
Mogisusuai abaabayan posodiaon kaamung noh boling om manganit piasau, manangkus suang karung, sumimbul om manambut tontolu, mamagayat dukug, om ogumu poh kagu. Karamaian nopo nga aiso kabarai om poingukab kumaa tulun togumu.
Wawa linopotan (hamper) posodia nogi kumaa di kamanang ngawi. Sipoot rayat diti potimpuunon doti di Puru Parlimen Sepanggar Datuk Jumat Idris id jam 9 kosuabon.
Om ontok ponong dongotuong 9 Disember nopo nga, kaharo Konsert Mega Krismas Manggatal kaharo id Dewan Masyarakat Manggatal, tumimpuun jam 6.30 dongosodop.
Konsert diti popokito do artis-artis nointutunan miagal Felix Agus, Velvet, Nera, DJ Othoe, Bobb, Welson, Gedion, om ogumu poh kagu. Toinsanan alapon tumindapou om sumuang nopo nga aiso kabarai.
Montok nunu noopo ponguhatan obuli rumomut Ponorikohon Songowian Komiti Panganjur Karamaian Krismas Manggatal Dr Jidon Adrian Janaun id numbur 017-8330411 toiko emel di jidonjanaun@gmail.com.