4kg dadah nahau, kikotumbayaan mantad Belanda miampai gatang dagang RM356,860
KOTA KINABALU: Ralan popolisok do dadah idsuang bagasi pakaian nangapakai kinotutukon dilo nougar miampai kinokitonan duwo lopot pil ecstasy kiwinagat kiikira 4 kilogram (kg).
Potunud Kastam Pogun Sabah Datuk Hamzah Sundang minoboros do kinokitonan dilo kopoompit do kiginumu 10,196 tinan pil miampai anggaran gatang dagang kiginumu RM356,860.
Tumanud dau bagasi dilo pinosuang idsuang iso kotak ih pinokirim mantad pogun Belanda om nonuan alamat doid Sandakan.
Poingkuro poh nga ka disido, soira kotak dilo pinorisa minomoguno do mesin pomorisa id Upis Kastam Raan Pongolopotan Pos hiti, korikohonon idsuang kotak dilo noilaan do haro ahal di au koontok toiko kopotongob.
“Asil laang potilombus sontimungan puru kastam mantad raan narkotik nokoilo do haro liwang tolosok idsuang bagasi dilo.
“Id suang liwang dino nokomoi pinataru linopotan kiwarana oitom ih kisuang do pil-pil kikotumbayaan do dadah kawo ecstasy mogisusuai warana,” ka dau kuminaa monunurat abar hiti koniab.
Minoboros isio do songulun suspek kusai kinoiyonon kiumur 54 toun ih nokorikot montok mokianu kotak dino nokomoi tinaan id Upis Kastam Raan Pongolopotan Pos.
Minoboros Hamzah do suspek tinaan kiikira jam 12 tangadau ontok 28 November nakatalib om baino pinonguwungan solinaid turu tadau.
“Ponoriukan papanaon tumanud Seksyen 39B Akta
Dadah Koligogon (ADB) 1952 om nung katantu do kasalaan obuli mogowit ukuman giwison gisom apatai.
“Iti nogi kes kumoiso toun diti kopoompit do pinonginaman mogowit lumosok dadah maya upis pongolopotan pos.
“Pokionuon do Kastam Sabah o tulun togumu manahak do kopoilaan kumaa upis kastam songindoros toiko rumomut numbur osimbayan tol 1-800-88-8855 nung haro kopoilaan kokomoi do kopomilutan toiko kapatayadan dadah,” ka dau.