Kapanahakan waig id Ranau nayamutan
RANAU: Kapanahakan waig nusapan Koupisan Waig Ranau au olidang (nayamutan) sumusuut liud kirana id Bawang Liwagu ih ponogi kotos tagayo pamaganuan waig doid loji koupisan dilo.
Liur rana natadon do piipiro pom pakaayan id loji dilo au kaanu papanau kotorinaan mantad podi tadau Minggu sabap nountunan togis, rana/ burutak, kawatuan om raan kayu.
Ilo koposusa do pakakaraja Koupisan Waig montok momorisi loji dilo miampai timpu di tosikap sabap aiso injin montok momonsoi dilo.
Kapanahakan waig mantad loji dino nokomoi asaru otingkodan potitikid timpu antakan liud, mantad podi kinantakan guminuyu tana nokoimamang watas diti ontok 5 Jun 2015.
Koyuon diti kopongimbulai do mogisusuai kosusaan kumaa ribuan momoguno doulu noh mongindapu ngawi garai taakanan om restoran kamaung noh longkod pongidopan posorili watas diti.
Namot dilo, mogigion Ranau alansan kopio mooi do kaanu porinta poposikap do projik popoinggayo do kapanahakan waig tolidang watas diti miampai poruntukan koporintaan Longkod kiginumu RM29 riong miagal ih nokoboros noh pogului diti.
“Alansan tokou kumaa porinta tuh papanau do projik popoinggayo kapanahakan waig tolidang dilo miampai tosisikap sabap do waig nopo nga iso kogunoon tagayo,” ka di Dato’ Amir Hamzah, 49, songulun mantad mongindapu restoran id Kakadaian Ranau.
Songulun kagu momoguno, Radin Kingawan, 54, mantad Kg Timbua minangatag nogi mooi porinta papawaliu do logi pongusapan waig ih haro baino pakaayan id bawang suai miagal ih piboros-boroson pogului diti.
“Suntu dilo, mundaliu doid Bawang Nekimura poingoros Bawang Mamut ih noilaan pialatan bawang waig dau toririmo oniting om au nayamutan guminuyu tana di nakatalib,” ka dau.