Ruminisjito GST id Sabah nokoingkawas: Hamzah
KOTA KINABALU: Ginumu ruminijisto
Sukai Barang om Kotorinaan (GST) id
Sabah nokoponurat kinoingkawasan tosonong kopio toun diti.
Potunud Koupisan Kastam Diraja Malaysia (JKDM)
Sabah Datuk Hamzah Sundang minoboros do kiginumu 24,610 nokorijisto GST pinosurat id pogun diti.
Tumanud dau, tumanud do asil sukai
GST ih nopuhu JKDM, ilo nokopokito do kinoingkawasan di takawas.
“Iti nogi ponokotanda doid komponi om pomorunan id Sabah, maid-laid ogumu ih koilo kokomoi kapatanudan doid koundangan o koturan GST.
“Poingkuro poh nga, haro wookon bogian pomorunan ih kakaal au osongkuro karati do koturan GST.
“Mantad dilo, kiginumu 6,552 kopoilaan GST03 au nakaanu pinapatahak doid JKDM id suang timpu di pinatatap toun diti,” ka dau.
Noboros disio ahal dilo kuminaa media kalapas pinonimpuunan Kopoimaganan Abaabayan Duta GST Nayatan Pogun Sabah, hiti konihab.
Minoboros Hamzah, gisom wulan (Oktober) gisom Oktober nakatalib, kiginumu 89,791 kogumuo kopoilaan GST03 mositi pataahakon doid JKDM.
Mantad ginumu dilo ka dau, kiginumu 3,587 kopoilaan pinatahak nakatalib timpu di pinatatap om 2,935 kopoilaan kagu au poh nakatahak doid JKDM.
Maya ababayan ‘Duta GST’ dilo, bogian diolo popoiyon do upisor ngawi GST id koisaan om lamin poniagaan pointongkop pogun.
“Abaabayan diti kitujuan popoingkawas do rontob kapatanudan rumijisto GST nokomoi kapatantuan papalabus do ‘invois’ sukai, kapanahakan rikud ngawi, kapanahakan kopoilaan GST om om pambaraian sukai tumanud timpu di pinatatap.
“Koponulung nogi ino do rumijisto GST montok kapaganu do karaja tutuduk kikompitan koundangan GST suai ko popoingkawas do sistom kapanahakan JKDM,” ka disio.
Id abaabayan dilo, Lamin Poniagaan om Pomorunan Tionghua Kota Kinabalu (KKCCCI) linantik sumiliu tambalut miapu JKDM montok manganjur do abaabayan ‘Duta GST’ dilo.
Nokotindapou nogi ih Porosiden KKCCCI Datuk Michael Lui Yen Sang.