Masaon pulis monoriuk
# Nokoompit doti rayat Malaysia miampai tinimungan IS
KOTA KINABALU: Pulis baino masaon papanau do ponoriukan tosorisid montok mongilo nunu noopo kopohompitan rayat Malaysia miampai tinimungan militan Pogun
Islam (IS).
Pesuruhjaya Pulis Sabah Datuk Ramli Din minoboros do laang dino nokomoi pinapanau sumusuhut pinanahanan apat tulun Indonesia kalapas kikotumbayaan nokoompit miampai tinimungan IS kotimpuunon wulan diti.
“Koinsanai tulun songkosuaian kiumur
31 gisom 40 toun ih tinaan id Sandakan patahakon doid Bogian Anti Taraat (E8) Raan Poibida Bukit Aman montok soriukon.
“Montok timpu diti ponoriukan potilombus masaon papanaon kamaung mongilo nunu noopo kopoompitan mantad rayat id pogun diti miampai kaparagatan tinimungan IS.
“Nung nonggo-nonggo bogian kohompit idsuang tinimungan taraat diti au mongira id
Sabah toiko Semenanjung, ihumon tokou om papaharo do pamagakaman kumaa diolo,” ka dau.
Noboros disio ahal dilo id pitimbungakan abar kalapas Abaabayan Pinitimungan om Pinonguludan mamanau kopinamot Pangaramitan Maulidur Rasul 1437 H/
2017 nayatan Bandaraya Kota Kinabalu ig Longkod Upis Pulis Kontinjen (IPK) Sabah konihab.
Nokotindapou nogi ih Mayor Bandaraya Kota Kinabalu Datuk Yeo Boon Hai om 12 tinimungan koponguludan mamanau ih uminampai do abaabayan dilo.
Ontok 6 Disember nakatalib, Boyoon Pulis Pogun Mohamad Fuzi Harun pinapatantu do apat tulun songkosuaian tinaan kalapas kikotumbayaan do pinoposiliu Sandakan sabaagi ‘transit’ montoklumosok sumuang doid Selatan Filipina montok umampai IS do hilo.
Koinsanai suspek baino diti soriukon tumanud Akta Koumoligan (Laang-Laang Poimbid) 2012 (Akta 747) Sosma.
Id ningkokoton misusuai noboros di Ramli do Pulis Diraja Malaysia (PDRM) miampai pisokodungan bogian monguasa Filipina kakaal aparagat mogihum songulun kagu puru tinimungan Abu Sayyaf ih kakaal poingidu.
“Suai ko miturubung om miapu kopoilaan miampai tambalut tokou id Filipina, ahal diti nogi pogibabarasan idsuang miting ahal koumoligan papak kosilahon Sabah songowian Kumoduo Luguan Montiri Datuk Seri Dr Ahmad Zahid Hamidi om Boyoon Montiri Sabah Tan Sri Musa Aman id Lahad Datu di tadau Kaapat nakatalib,” ka dau.
Kiikira jam 3 minsusuab ontok 4 Disember nakatalib, Tinimungan Bogian Koumoligan Poimbida Papak Kosilahon Sabah (Esscom) minamadi noduso songulun puru tinimungan Abu Sayyaf ilo nopo nga ih Abu Paliyak id kinantakan misusuli pinamadian id kawaigan Daat Silam poingoros Pulau Kantung Kalungan.
Limo kagu puru tinimungan Remy ih nointutunan nogi sabaagi ‘Two Brothers’ nagakom noh om apat ih suai binadi noduso di bogian monguasa Filipina.