Tondu Indonesida nadanda RM8,000 manaak kotoinaan ‘padagang tinan’

KOTA KINABALU: Kuut Majistret doiti koniab minongontok ukuman danda RM8,000 kumaa songuhun tondu Indonesia kahapas natandasan minangakun kihasa manaak do kotoinaan pinsundalan (padagang tinan).

Manakadai Popolijisto Vanan Herlina Muse pinapaatu do ukuman dino nokomoi kuminaa Fironika Gunawan, 36, ih dinawa manaak kotoinaan ‘padagang tinan’ id iso hinimput hotel apagon doiti ontok 11 Disember, jam 9.40 dongotuvong.

Miampai dino natandasan dinawa tumanud Seksyen 372B Kanun Koundosoan ih kopogovit ukuman tolungku sohinaid sontoun toi danda, toi goduvo-duvo danda dino.

Nung natandasan au kabalai danda dino nokomoi, obuli isido tolungkuon sohinaid onom vuhan.

Naamot dino, id Kuut Sesyen, songuhun pakakalaja tuhun ginumuan pinakavasa do kogos jamin kahapas luyal mongingohig dau Mohd Azhier Farhan Arisin minonoodo pokiinsianan kogos jamin dino id doumbangan Hakim Noor Hafiza Mohd Salim ontok pinonoinaan kes dino nokomoi, doiti koniab.

Ponuu’an nogi di hakim ih natandasan montok popoluput tinan id balai polis songindoos ontok tadau Kohimo minggu koiso om kotohu tikid vuhan. Pasport natandasan nogi mositi pataakon doid boogizan pangadavaan nung kivaa.

Hazri songovian duvo vagu tambahut dau Muhhamad Nurfazrie Ashraf Norman om Mohd Salizam Salim dinawa minonoodo pongolumpakan nokomoi balangan sanganu duvo kusai sanda-daau kiumul 18 om 16 toun id Kadai Biliard, Kakadazan Haid Papar ontok 19 Oktober, jam 1 sosodopon.

Balangan dino kamaung no kantung sandangon, dompet, kad ATM, talipaun piovit-ovit jenama Vivo om kad kointutunan goduvo-duvo munggui.

Sabap kahasaan dino, kotohutohu natandasan dinawa minonoodo kahasaan id siibo Seksyen 395 Kanun Koundosoan ih kopogovit do ukuman tolungku gisom 20 toun om obuli ontokon pasuton.

Pombisalaan montok kes dino papanaon ontok 9 gisom 12 Februari 2018.

Id Kuut Sesyen misusuvai, duvo tuhun Filipina pinaatu ukuman tolungku apat vuhan om songuhun nontok do iso pasuton sabap suminuvang pogun diti miampai aiso ‘dokumen’ di totopot.

Hakim Ainul Shahrin Mohamad pinapaatu do ukuman dino kuminaa Noorwahida Mijul, 26, om Nuar Jamsi, 21, kahapas goduvo-duvo natandasan minangakun kihasa suminuvang pogun diti miampai aiso pas ih totopot.

Goduvo-duvo natandasan sandadaau dinwa aiso pas pindahanan di totopot ontok tinaan ontok 7 Disember om 27 November posoihi Kota Kinabalu.

Sabap kahasaan dino, goduvo-duvo natandasan dinawa tumanud Seksyen 6 (1)(c) Akta Imigresen 1959/63 ih kopogovit ukuman danda RM10,000 toi tolungku ‘maksimum’ himo toun, toi goduvo-duvo dino om pasuton, nung katantu do kahasaan.

Goduvo-duvo natandasan nogi pataakon doid Koupisan Imigresen kahapas asalasai papanau do ukuman.