Tolu projik mongorulan liud id Kota Beluid maan papanao
KOTA BELUD: Kiginumu tolu projik montok manalasai kobolingkangan liud ih anggapon kobilangan kopio id Kota Belud, maan papanao idsuang timpu tosomok, ka di Montiri id Koupisan Luguan Montiri Datuk Seri Abdul Rahman Dahlan hari ini.
Puru Parlimen Kota Belud dilo minoboros do projik dino nokomoi kopohompit do karaja pangantaban liud om paparalom tolu bawang tagayo id watas diti, ilo nopo nga Bawang Abai, Bawang Tempasuk om Bawang Kadamaian.
“Kobolingkangan liud id Kota Belud nosiliu kobilangan sumusuhut kinantakan guminuyu tana ontok 2015.
“Kinantakan dilo natadon do Kota Belud nosiliu miagal ponimungan liud, miampai rontob waig nokoingkawas 20 paratus mantad podi guminuyu tana dilo natadon do watas diti nakakandai liud di taraat kopio,” ka dau kumaa monunurat abar kalapas tuminindapou miting poimbida liud Kota Belud hiti, konihab.
Minoboros Abdul Rahman do poruntukan kiginumu RM20 riong mantad RM27 riong nokolulus noh koporintaan longkod montok karaja ngawi mangantob liud montok timpu toniiba om RM50 riong mantad RM140 riong nookunan montok karaja pangantaban timpu tanaru.
Minoboros isio do projik kotolu nopo nga kopohompit do projik paparalom do bawang miampai kopongoluangan tana ih lumuyung mantad bogian tana akawas id Ranau sabap guninuyu tana.
Upisor Watas Kota Belud
Gari Itam ih nogi Ponorikohon Ponorinaan Kaantakan Taraat Watas minoboros do kopongoluangan tana papanaon di komponi misosondiri sabaagi laang osikap montok momorisi do bawang dino nokomoi mantad tana ih lumuyung mantad tana kawas dilo.
Minoboros isio do montok toun diti noopo, Kota Belud nokotoguang liud kiikira kiginumu 70 miampai kinopawalihan munggui liud pinapanau kiginumu inggonom.
Namot dilo, Montiri Komunikasi om Multimedia Datuk Seri Dr Salleh Said Keruak ih nogi Puru Lamin Koundangan Pogun (ADUN) Usukan minoboros do pisokodungan toinsanan tinan kiguno montok tumoguang ‘fenomena’ dilo om ilo au apatut do pimpulitikon.
“Okito tokou UMNO om Barisan Nasional (BN) mindahu montok monulung munggui liud, okon montok popopokito nga tokou toinsanan parti montok monulung om popokito do kikosianan kumaa rayat,” ka dau kalaps miting poimbida dilo.
Miting dilo, ih pinnorikohon di Gari, notindapou nogi di Panakadai Montiri Pomutanaman om Pomorunan Taakanan Sabah Datuk Musbah Jamli ih nogi ADUN Tempasuk om ADUN Kadamaian Jeremy Malajad.-Bernama