Kada korosiai ‘sulian’ kawagu gugumaga idsuang media sosial: Musa

KOTA KINABALU: Pinosorou puru Umno tuh au poingkadaada ontok ‘songodon’ di gugumaga idsuang media sosial katapi mositi ilagon toinsanan kopongundoronokan di haro.

Minoboros ih Boyoon Montiri Sabah, Tan Sri Musa Haji Aman do puru Umno au minog do orosian soira mitoguang panangadan irad dilo sabap susuian ponokotanda do porinta ih haro baino diti nokopogowit noh do kinalantaian.

“Posorohon ku ikoyu toinsanan tuh sulian kawagu panangadan dilo miampai manahak suntu kinalantaian di nowit tokou.

“Au minog orosian sabap nakapanahak tokou noh tanda do ‘ekonomi’ pogun agaras, gugumaga koilo noopo monombirang katapi tokou idsuang porinta toririmo mindahu gana (minsuang kampung-kampung) montok monulung rayat,” ka dau id Abaabayan Koponimpuunan Konvensyen Media Sosial Umno Sabah, hiti konihab.

Minoboros isio do media sosial nopo nga iso kakamot ih kiguno ontok timpu baino om puru Umno mositi momoguno do kolobian dilo montok kapaganu do sokodung tinimungan tomulok montok tumoguang Pomilian Tagayo Ginumuan Ko-14 (PRU14).

Ka dau PRU14 ih pohoroon do soira-ira timpu noopo momoguno do rontob koposodiaan di takawas kumaa puru Umno.

“Kiguno kopio pokitonon tokou do toririmo poinsodia tokou tumoguang miampai toinsanan pongindaraatan ih pinarayat id suang media sosial.

“Mositi sumodia toou sumimbar toinsanan ahal ngawi ih nungkit miampai kopoilaan om rontob di tototopot,” ka

MUSA (duwo wanan) minongowoyo Zahid (tolu wanan) ontok nokorikot id abaabayan dilo.

disio.

Minoboros ih Musa do puru Umno nogi apatut gumaga do momuruan idsuang media sosial suai ko paparayat do koinsanai kinalantaian di nowit noh do porinta.

Nokotindapou nogi id abaabayan dilo nga ih Kumoduo Luguan Montiri Datuk Seri Dr Ahmad Zahid Hamidi, Ponorikohon Biro IT om Media Sosial Malaysia Datuk Ahmad Maslan, Montiri id Koupisan Luguan Montiri Datuk Seri Abdul Rahman Dahlan om Montiri Kabinet ih suai.