Mukim Senagang kangaam poinggoyoon sabaagi watas tokoodo: Sairin
KENINGAU: Mukim Senagang poinsuang bogian Lamin Koundangan Pogun (DUN) Liawan id Keningau, ih samakin tumounda miampai ginumu mogigion di maid-laid mingkawas, kangaam kopio poinggoyoon sabaagi iso watas tokoodo.
Panakadai Montiri Pomutanaman om Pomorunan Taakanan Sabah Datuk Sairin Karno, ih nogi Puru Lamin Koundangan Pogun (ADUN) Liawan, minoboros do ‘status’ mukim dilo sabagai watas tokoodo om popomilo do pamalanan oulud kaanu papanahon mooi do koiyonon dilo kaanu tumounda miampai lobi togumu.
“Senagang poinsumpak id bogian hinonggo pomorunan samakin mingkawas.Ilo kangaam kopio pilion sabagai iso watas noponu,” ka dau doid monunurat abar kalapas pinotimpuun do Abaabayan Misain Nota Misokodung Tagal Kampung Senagang hiti konihab.
Pokionuon di Sairin o bogian monguasa id watas Keningau, doulu noh upis watas, misokodung miampai momuruan songkoiyonon montok poposodia do kogunoon ih monokodung atag poposiliu do Senagang sabaagi watas tokoodo.
Pogului, noboros di Sairin do Komontirian Pomutanaman om Pomorunan Taakanan Sabah toririmo monokodung toinsanan laang Koupisan Ponginsadaan Pogun momogompi om popotounda do ‘sistem tagal” id pogun diti.
Ka dau abaabayan dilo katanud miampai gaab porinta montok momodimpot pokirikotan ‘Dasar Agromakanan Negara’ (2011-2020) ilo nopo nga 70 tagal ontok oriot timpu 2020.
Tagal nopo nga iso sistem ponorinaan kotos ponginsadaan tindal miampai mogigion id bawang-bawang songindoros kampungkampung id Sabah. Tomposion bawang doulu noh sada au pakawasaon gokomon tumanud korohian ginawo noopo nga ontok timpu pointantu ih pinatantu di mogigion kampung montok papatantu do kotos sada au opunso.
Poingkuro poh nga, minoboros isio do laang dilo au doti osigampot nung au kaanu sokodung om pisokodungan poimponu mantad toinsanan tinan, doulu mogigion songkoiyonon.
Pinosotol di Sairin do asil tagal nopo nga montok papatantu do kotos ponginsadaan ilo nopo nga bawang id pogun diti nakaanu minongolig om asil dilo gokomon miampai awakas tuh au atagak irad dilo noopo. Bernama