Aplikisin monuidong kopilitif nokoingkavas
#Tuhun togumu samakin otumbozo tonggungan boogizan kopilitif - Yaha
KOTA KINABALU: Tuhun togumu samakin otumbozo nokomoi tonggungan boogizan kopilitif montok popoingkavas do koikonon ‘sosioekonomi’ om kohumaagan layat id kakadazan toi id habus kakadazan, ka di Kumoduvo Vozoon Montili Sabah Datuk Seri Yahya Hussin.
Minoboos isido iti okito kozo maza kinoingkavasan kogumuo aplikisin montok monuidong kopilitif mantad vookon tuhun ngavi.
“Iti nogi ponokotanda do abaabazan kopongubasanan om kopiumanan pouhanon do Tinan Monoina Kopilitif Malaysia (SKM) nakaanu minongukab pomusaavan om ‘persepsi’ tuhun ogumu boogizan kopilitif kamampu manaak dosido hivang om kosivatan montok kapaganu do hobi ogumu ‘ekonomi’ kotopong miampai komponi misosondii ih suvai,” ka disido.
Noboos disido ahal dino ontok minoniikon Miting Tinan Pilundingan Kopilitif Nazatan Pogun Sabah (MPKN) doiti koniab. Nokotindapou nogi ih Potunud SKM Sabah Umar Sarim Saidin, upisol vanan komontilian pisompuuvan om pogun, momuu’an boogizan kopilitif, puu akademik om hansanon boogizan misosondii.
Yahya ih nogi Poniikon MPKN Sabah minoboos do MPKN mimang kopilitif id Sabah tu hobi avakas om kamampu monoina do poniagaan di obuli kobuu, koponokiahit om kaanu popoingkavas kapapanaan kopilitif montok manakadai popoingkavas do koikonon ‘sosioekonomi’ om kohumaagan layat.
Minoboos isido kapamanaan kopilitif id Sabah kiuntung kozo om ounsikou sabap montok kumoinsan nogi id susuzan kopolintaan pogun id siibo kopomuu’anan Vozoon Montili Tan Sri Musa Aman manaak kosivatan kapamanaan kopilitif id Sabah kopiuman do pamahagizan Bajet Pogun 2018.
Ka disido kousinan okitonan pagahasan asaanang RM10 lizong pataakon doid Kopilitif UpisolUpisol Kopolintaan Sabah Berhad (KOPEKS), om RM3 lizong vagu poobion doid kopilitif-kopilitif ih vagu po tuminimpuun poniagaan id okitonan galan kotundaan.
Minoboos Yahya do noingkokoton dino ponokotanda do kapamanaan kopilitif samakin kapaganu kopadadizan sabaagi boogizan ih kaanu monuhung monguang do balanja kopoposiozon tinimungan kipandapatan osiibo hoohobi tinimungan B40.
Isido ih huminansan kapamanaan kopilitif Sabah nogi monongkotohuod doid kikosianan Musa nokomoi kinoingkokoton om kotundaan kapamanaan kopilitif id pogun diti.
Naamot dino, minoboos Yahya do kogumuo kopilitif ih pinolijisto id Sabah gisom 30 Jun 2017 nga 1,140 tinan miampai kokuatan 318,891 puu.
“Ginumu ‘model syer’ om yuran notimung soginumu RM169.6 lizong om halata RM774.5 lizong. Om ginumu kinoonuan pinosuat montok timpu onom vuhan koiso toun diti soginumu RM199.1 lizong. Kinonuan diti humansan 61.2 piatus mantad ginumu naanu kinovion toun nakatahib kiginumu RM323.8 lizong,” ka disido.
Id pitimbungakan dino, Yahya ih nogi Montili Pomutanaman om Pomounan Taakanan Sabah nogi minanaak cek Sakadai Kotundaan Kopilitif doid Kopilitif Paganakan Dehamboi Gunsak Kota Belud Berhad om Kopilitif Karanahan Kota Belud Sabah Berhad, sanda-daau kiginumu RM40,000 om RM50,000. -Bernama
Yahya pinapataak sakadai kumaa Poniikon Kop Karanahan Michael Asik.