Toririmo porinta monulung rayat
# Kada poomungo pamahagian kogunoon sikul miampai pulitik - Yahya
PUTATAN: Pinosorou o rayat mooi do au popoompit do kapanahakan sakadai kogunoon koposikulan mantad porinta sabaagi iso mantad laang maganu undi soira orikot timpu Pomilian tagayo Ginumuan Ko-14 (PRU14).
Kumoduwo Boyoon Montiri ih ponogi Montiri Pomutanaman om Pomorunan Taakanan, Datuk Seri Panglima Yahya Hussin minoboros do kapamahagian sakadai kogunoon sikul montok tanak ngawi id Petagas pohoroon do tikid toun, kagu nga kopompit nogi do bogian Parlimen suai.
“Pamahagian sakadai irad dilo mositi do au poompiton miampai gaab pulitik sabap tokou sabaagi lansanon rayat (porinta) toririmo monulung rayat au mongiro timpu om toun.
“Okon montok sakadai kogunoon koposikulan noopo, nga mogisusuai sakadai nopibabahagi noh porinta kaamung noh sakadai mantad dogo sondiri ih kigaab montok monulung papagaan do kawagatan kopoposion rayat,” ka dau ontok romuto kalapas pinotimpuun do ‘Program Ziarah Kasih’ ‘Happy 2 School’ pinanjur Umno Malaysia id Dewan Sri Putatan, doros hiti konihab.
Ka dau, suai ko monulung montok kotundaan balajaran, nakapanaak nogi do sakadai suai kumaa rayat doulu noh kumaa popoburu pomutanaman om ponginsadaan ih pinatahak miampai au pokigatangan mooi kaanu rayat papanau do kopoposion miampai lobi tosonong.
Minoboros Yahya do laang tolidas diti ponokotanda do porinta maya do kopomuruanan Luguan Montiri Datuk Seri Najib Tun Razak otootopot kopio muhang minsomok om mamarati do kogunoon rayat.
“Tokou (porinta) toririmo papasanang do nunu noopo ih posuulon rayat doulu noh id pogun diti kaamung noh papanau do kotundaan ‘infrastruktur’ ih koponolon balanja ratusan riong ringgit montok kapasanangan rayat.
“Mantad dilo, sabaagi rayat, apatut monongkotoluod tokou om mamagatang pinongulubukan om winakas karaja koporumuruanan porinta baino ih tantu do sonong ginawo miampai ralan monulung popoguli do porinta ontok PRU tiinu,” ka dau.
Kokomoi sakadai kogunoon sikul kumaa 1,000 susumikul id Parlimen Putatan, Yahya ih ponogi Adun watas dilo alansan kopio kumaa molohing susumikul koondom do karaja tosonong porinta ih haro baino.
Ka dau, koinsanai kotundaan balajaran om sakadai ih pinatahak solinaid diti nopo nga montok kogunoon sinakagon tomulok ih posodia mongigit kopomuruanan timpu tabantalan.
Suai mantad dilo, alansan kopio isio do kapamansaian linominon SMK Petagas ih opongo toun diti sumusuhut kopongorumpasan sikul id bogian Putatan au kaanu momorumpos ginumu susumikul baino diti.