Rayat mositi apandai momili porinta ototopot kaanu moningolig diolo: Yahya
PUTATAN: Rayat mositi apandai momoguo kuasa diolo sabaagi pongundi miampai momili porinta ih ototopot kaanu manamong om moningolig diolo, ka di Kumoduo Boyoon Montiri Sabah Datuk Yahya Hussin.
Minoboros isio do rayat, doulu noh momili nokorijisto, haro kuasa montok papatantu do porinta ih kaanu kopio montok momogompi kotoonongan om kopogowit koburuon kumaa pogun.
“Tantu do tokou alansan kopio rayat mongundi Barisan Nasional (BN) montok tumilombus momorinta pogun.
Tikid timpu, manahak porinta BN do mogisusuai sakadai montok rayat sabap toririmo porinta maganu laang kangaam kopio montok papasanang do kopoposion rayat.
“Mositi sorohon tokou om mongunsikou do karaja tosonong porinta mooi do kotilombus koporintaan BN popotopot do tonggungan diolo kumaa rayat miampai lobi kiasil kagu,” ka dau kuminaa monunurat abar kalapas ‘Program Ziarah Kasih’ ‘Happy 2 School’ Parlimen Putatan hiti konihab.
Yahya ih nogi puru lamin koundangan pogun Petagas, pinoposorou nogi rayat montok mongilag nunu noopo laang di obuli kopogowit doid pibabakan om kapangasou kotoonongan om kolumaagan di nosigampot id pogun diti. Ka dau, pisaapan pulitik ih nokoimamang pogun suai, doulu noh id pogun timur tengah, mositi silihon suntu kumaa rayat id pogun diti montok mongunsikou do karaja tosonong koporintaan solinaid diti.
“Koporintaan BN au muhang rayat kopuriman diolo gunoon do tulun suai ih kontodonon doti do rayat oingorit.
Intongan tokou noopo id pogun suai ih misangod hinonggo rayat diolo asanang gugunoon gisom haro nogi rayat diolo osiliu ponongkusan sabap kasala momoguno kuasa momili ih haro montok diolo,” ka dau.
Minoboros Yahya do koporintaan BN okon noopo toririmo kumaraja montok papatantu do kapasanangan rayat baino diti, nga haro pamalanan timpu tanaru om otopot kopio montok papatantu do kopoposion poinsosonong montok sinakagon timpu tabantalan.
Pialatan karaja ih masaon papanaon porinta nga kotundaan ‘infrastruktur’ miagal Projek lebuh raya Pan Borneo om pamansaian om mongumbasi sikulan, ka dau. -Bernama