Padamaan gugumaga osohut, au milo otumboyo, ka Radin
TENOM: Montiri Kotundaan Labus Kakadaian Sabah Datuk Seri Radin Malleh minoboros do mositi do tulakon do rayat o padamaan parti ngawi gugumaga sabap gaab padamaan diolo osohut om au milo otumboyo.
“Ontok gulu poh (haro pialatan) diolo nokoumbal minongigit karaja kiguno idsuang porinta..haro ih (nokoumbal) minongigit karaja kumoduo boyoon montiri, montiri wanan koporintaan Pisompuruan om kumoduo montiri (Pisompuruan).
“Iyolo (gulu poh) nopo nga momonsoi koputusan ih monokodung ralan tonudon ngawi porinta, nga soira kiharo iyolo id suang tinimungan gugumaga opurokis iyolo minsingkiwal porinta ih nokoumbal minanahak karaja tosonong kumaa diolo,” ka dau ontok minanahak boboroson id Abaabayan Momuruan Songowian Pongundi Kampung Batu 90 hiti, konihab.
Id ramai dilo, kiginumu 84 pongundi tomulok pinapatahak do foom kopuruan montok sumuang do Parti Bersatu Sabah (PBS).
Mantad dilo, angatan di Radin o rayat tuh tumilombus songowian om mongundi Barisan Nasional (BN) ontok pomilian tagayo ginumuan timpu rumikot sabap padamaan BN otopot kopio montok moningolig nasib rayat.
Radin ih nogi Puru Lamin Koundangan Pogun bogian Melalap minoboros do sokodung poimponu rayat montok papatantu do kamanangan BN ontok pomilian tagayo timpu rumikot kiguno kopio montok papatantu do abaabayan ngawi kotundaan porinta kaanu popotilombus tumanud pinamalanan.
“Rayat id watas diti momoguo do kotundaan om ino nopo nga timpu di koontok kopio montok monokodung om popotimporon BN id pomilian tagayo timpu rumikot,” ka dau.
Kokomoi kinampayatan 84 pongundi tomulok dilo idsuang PBS, noboros di Radin do laang pongundi tomulok suminuang PBS om momili BN sabaagi impoon padamaan pulitik diolo minog kaanu pangarayahan. -Bernama