BN pilion kogumuan rayat
# Otumboyo Hajiji BN tatap monuridong porinta kalapas PRU14
KOTA KINABALU: Montiri Koporintaan Kinoiyonon om Pomulaminan Sabah Datuk Hajiji Noor kotumboyo Barisan Nasional (BN) kotimporon sabaagi porinta ih momorinta pogun dilo om nogi longkod kalapas pomilian tagayo ginumuan ko14.
Bendahari UMNO dilo minoboros do kotumbayanan dau tumanud do kinangaian tosonong BN montok mogowit koburuon om kotundaan montok kolumaagan rayat, doulu noh id Sabah suai ko ‘majoriti’ rayat okitonan kakaal monokodung BN.
“Iyolo ih moboros (au monokodung) dilo montok piipiro noopo...sabaagi pogun ‘demokrasi’, iyolo obuli aparagat mimpulitik om manahak sokodung kumaa nonggo-nonggo parti ih korohian diolo.
“Poingkuro poh nga, miampai koyuon id tutubpon (sokodung bogian gamut sakot om kotundaan porinta), tokou kakaal kotumboyo BN tatap kaanu sokodung montok momorinta koporintaan poghun om koporintaan pisompuruan id pomilian tagayo timpu rumikot,” ka disio kuminaa monunurat abar hiti konihab.
Hajiji ih nogi Puru Lamin Koundangan Pogun Sulaman, minoboros do rayat mositi momoguo do ‘hak’ diolo sabaagi pongundi miampai lobi opurokis miampai momili porinta ih otopot kopio ogumu minogowit ponimbanan suai ko toririmo minggisom papatantu do kaandangan ekonomi om pulitik kotilombus ogompi.
Idsuang ahal dilo, pinosorou nogi di Hajiji o upisor om pakakaraja koupisan om agensi id suriba komontirian dau tuh au oimbayatan toiko katanud-tanud miampai nonggo-nonggo bogian paparayat do panandasan di au otopot kumaa porinta maya do media sosial.
Upisor om pakakaraja porinta mositi manaan tonggungan om kuasa sabaagi pakakaraja tulun ginumuan miampai papatarang do koinsanai laang kotundaan nowit porinta montok rayat, ka disio. -Bernama