Tolu watas noliudan
# Ruminasam minogompus mantad podi tadau Koiso
KOTA KINABALU: Rasam minogompus mantad podi sosodopon tadau Koiso natadon do tolu watas id Sabah kaamung noh Penampang, Membakut om Kota Marudu noliudan.
Potunud Tinimungan Gugumaga Tulun Ginumuan Malaysia (APM) (APM) pogun Kamal Mokhtar minoboros do iso noh Longkod Kopowolihan Naamot (PPS) nukaban om gisom jam 6 sosodopon tadau Koduvo, koyuon liud kakaal kiharo id rontob atamangan.
“Koyuon liud ih minomiraag do duwo kakampungan ilo nopo nga Beliajung om Salimandut id Kota Marudu mantad podi tadau Koiso natadon do duwo PPS Sikul Kabansaan (SK) Teritipan om PPS id linominon Rukun Tetangga Salimandut.
“PPS ih pinopoiyon do koinsasanai 117 munggui mantad 33 paganakan dilo poingkuro poh nga notutuban noh id jam 1 sosodopon konihab sumusuut koyuon liud tumimpuun noh sumonod,” ka disio.
Isio poingkuro poh nga minoboros do rontob liud pinoruput noindamaan id bogian kakampungan Kuranji om Popok Darat natadon do 119 munggui pinawaliu doid PPS Dewan Komuniti tuminimpuun jam 3.45 sosodopon.
Namot dilo, onom kampung id Membakut kaamung Lumantak, Bambangan, Sinoko, Kayai, Baitam om Jambatan Baru pinoruput do nogi noimangan liud.
Ka disio sundung pia koyuon liud id watas dilo kakaal atamangan, bogian diolo papaharo do pongintongan mantad iso timpu doid iso timpu montok koposodiaan mogisusuai kaantakan doti di au osonong sumusuut rontob waig bawang Membakut baino nopo nga 6.0 meter ilo nopo nga id rontob kopoingatan.
“Montok watas Penampang, piipiro koiyonon pinoruput do nalabpaian waig ilo nopo nga Country Shangrila id Jalan Panglima Banting, Kampung Kolopis om Kampung Penampang Proper.
“Tolu ralan tagayo kaamung Ralan Datuk Panglima Banting, Ralan Kampung Kibabaig om Ralan Penampang Proper noliudan nogi nga kakaal obuli wayaan di toinsanan kawo padsakaian,” ka dau.