Hinonggo ma kapatayon do boros?

HINONGGO ma o kapatayon do boros?

Sisimbar nopo diti nga: id koyonon di au boroson do sanganu o boros. Boros Momogun id koligaganan do atagak tu au boroson do tulun Momogun sondiri.

Intangai id timpu baino hinonggo nopo, uhang do tulun Momogun mimboboros boros tinaru suai (boros Malaya/Indonesia) ko mantad po moboros boros Momogun doid walai, id walai panambayangan om kumaa tanak. Id kapangaramayan do tadau tagayo kaamatan uludon do tulun Momogun o abaabayan om pohoroon/pabantaan id boros Malaya tu modosi do au karati o songulun toi ko duo tulun tapantang mantad tinaru suai i nalap diolo mamung id tinimungan dii. Koduo kobungou, au koilo tulun Momogun momoguno boros Momogun do mongulud, popootus do abaabayan om manahak boboroson id tinimungan kapangaramayan dilo.

Nunu di rati ngaranan do tulun Momogun o tanganak diolo do tinaru Momogun nung au no diolo tudukan do boros Momogun? Nung atagakan tulun Momogun do boros tinaru, kousui yolo kokitanan do gawir (bats) tu tumulud miagal tombolog nga nung intangan wuros okon ko tombolog. Nung au o tulun Momogun mimboboros do boros tinaru, ilo tinaru suai nga milo sumiliu minagal-agal kopio tulun Momogun om kopooposion tulun Momogun id pogun diti. Kaantakan diti milo kopio abayaan tu nasaga o porinta ponontudukan do potudukon o boros Momogun id sikulan porinta id pogun diti. Id sikulan dino haro tulun Momogun do milo monuduk tu do gojian gia yolo do porinta. Nga susumikul Momogun di arahi minsingilo boros Momogun au ogumu om okon ko oinsanan mantad tanak tulun Momogun. Nokuro ma tu miagal dilo? Iri no tu mantad no do tanak Momogun dino au mangakun do tanak yolo tulun Momogun.

Susumikul di oliab ginawo minsingilo boros Momogun nopo nga tanak do tulun suai (tanak do pilak om suusuai) ih ruminikot id pogun diti. Oliab yolo minsingilo mantad no do kopuriman yolo koponsolon tagayo id koposion diolo soira koilo moboros boros Momogun id pogun diti.

Nunu ma koponsolon tagayo topurimanan diolo dino do minsingilo om kosingilo boros Momogun? Iri no tu milo yolo kounali mibagal kopio tulun Momogun id pogun diti. Baino diti isai-isai tulun id pogun diti kiharo kad kointutunan Malaysia mulong po do okon ko tulun Momogun i tulun.

Haro i minantad do pogun Malaya, Pakistan, Sulawesi, om id suusuai po nontodon. Komolohingan do tulun dino, soira maganak id walai pongolingasan porinta, poporijisto yolo ngaran tanak om onuan do ngaran miagal tinaru Momogun miampai koilo moboros boros Momogun!! Soira poporijisto id upis koporijistaan ngaran tanak kosususu, miagal po yolo di tulun orualan mikod-ikod uhoton do dokutur pongubatan.

Timpu udiyoon, mongikod yolo tologod id toguang di dokutur moi do orongou di dokutur. Miagal nogi di, timpu udiyoon yolo di upisor koporijistaan kinosusuon nunu ngaran tinaru diolo, mangakun yolo do tinaru yolo Momogun (native people) miampai koilo moboros do boros Momogun. Nga otutunan di upisor koporijistaan do au otootopot do tulun Momogun yolo. Songkuro koiman-imanan (disappointment) do tulun Momogun nung asaladan do ngaran tinaru miagal dilo sabaagi tulun Momogun di otootopot id pogun diti?

Mantad baino om gisom do soira-ira, apatut tulun Momogun do momusorou kaantakan diti om ologod daa sunduan manampasi boros tinaru sondiri om tingkadan nodi daa do moboros boros tinaru suai kumaa tanak soira do id walai, om id walai nogi panambayangan rumayou Kinorohingan id labus kakadayan hinonggo osompipi (atus paratus) tulun Momogun songintimung. Id pitimungan id kakadayan nga apatut nogi yolo momoguno boros tinaru sondiri.

Nung modosi yolo do au karati o songulun toi ko duo tulun tombului mantad tinaru suwai poingamung diolo, poingkokoto o songulun Momogun i koilo padalin boros Momogun id boros di orotian di tombului dino (boros English/ Malaya/Indonesia) tu orotian di tombului dino.

Nung manu tulun Momogun do osompipi (100%) momoguno boros tinaru id walai panambayangan, milo pohoroon diolo iso tinimungan i momoguno atus paratus boros Momogun. Id timungan momoguno boros Momogun dino kogumuon o wawa (incentives) patahakon kumaa tangaanak mooi do arahi yolo mamung id tinimungan dino.

Milo nogi tudukan do mononontuduk Momogun o tangaanak dino do boros Momogun id iso koyonon id tapus walai panambayangan dino. Miagal no daa diti o pokimamaan pointopot id pomusarahan om topurimanan do toinsanan tulun Momogun do manampasi boros Momogun id pogun diti