MPWS papawakas koonduan momodimpot kalantaian om mananahak toluod tosonong

KOTA KINABALU: Au olimon do Tinan Mononontuduk Koonduan Sabah (MPWS) montok papanau do tonggungan kiguno montok papawakas do tinimungan koonduan id pogun diti miampai mogisusuai ponoluodan tosonong kopio.

Minoboros ih Boyoon Montiri Sabah Tan Sri Musa Haji Aman do sundung pia id pogun diti kakaal kopokito do pisuaian kosoduo pialatan tinaru kusai om tondu, nga kada siliho do alasan dilo montok olomi sunduan.

“Baino, koonduan id pogun diti mongigit mogisusuai karaja kiguno idsuang bogian porinta om misosondiri.

“Ningkokoton diti otopot kopio kapanahak do pokitonan do koonduan baino diti papanau do tonggungan kiguno montok popoburu do hibokon om kotundaan pogun,” ka dau ontok pinotimpuun do Longkod Sakadai Guaman om Pinoimaganan Modul Interaktif Mongorulan Pisasawaan Tomulok, hiti konihab.

Teks pason dau pinolombus di Montiri Koporintaan Kinoiyonon om Pomulaminan Datuk Seri Panglima Hajiji Noor.

Minoboros isio do MPWS timpu 20172019 nokoposuul noh tolu projik kuminaa koporintaan pogun ontok toun nakatalib. Projek Longkod Sakadai Guaman Koonduan nakapanau kotorinaan mantad podi wulan Koiso nakatalib nakaanu ruminamit 14 kes om iso pitolu mantad kes dilo nasalasai noh.

Ka dau, pinapanau nogi MPWS do projik momonsoi ‘Modul Interaktif Perkahwinan Kanak-kanak’ (MIPK).

“Buuk montok modul dilo nakalabus noh suai ko ‘advokas’ om pingludaan montok “kaunselor’ tumimpuun ontok April tabantalan,” ka dau.

Namot dilo, Montiri Kotundaan Rayat om Ahal Momoguno Datuk Jainab Ahmad Ayid minoboros do kinodimpotan koonduan id pogun diti nopo nga asil mantad laang ngawi porinta pinoposodia do koposirilianan ‘kondusif’ montok papawakas do tinimungan dilo.

“Kinohoroon MIPK popomilo doti do mongingia ngawi toiko ‘fasilitator’ montok mongilag do pisasawaan tondu id umur tomulok.

“Monongkotoluod oku nogi maya pisokodungan om ‘komitmen’ pinatahak do MPWS songowian Koupisan Ahal Koonduan Sabah (JHEWA) montok papalantoi do duwo projik dilo,” ka dau.

Nokotindapou nogi id ramai dilo nga ih Ponorikohon MPWS Datuk Dr Tarsiah TZ Taman.

HAJIJI (tanga) pinotimpuun do abaabayan dilo mimapi sinaasi di Jainab (gibang) om Tarsiah.

RUMIJISTOH...Pialatan mogigion Kg Brunei Membakut ih ruminijisto tosikap id jam 8 kosuabon montok monoluod raha.

SAMPEL RAHA..Songulun mantad monoluod ih pinaganuan ‘sampel’ raha papasanang do monorina panapisan.