Potontuon otoonong, olumaag om aandang
Porinta ih kitonggungan noopo kaanu momorinta pogun miampai tososonong Salleh
KOTA BELUD: Montiri Komunikasi om Multimedia Datuk Seri Dr Salleh Said Keruak pinapatarang do porinta ih kitonggungan noopo miagal Barisan Nasional (BN) kaanu monorina om momorinta pogun miampai tososonong.
Minoboros isio do pogun di oporinta miampai tososonong miagal winonsoi do BN ih minongigit porinta mantad podi pogun nakalantoi, asil dilo oguno di toinsanan rayat.
“Ogumu kopio ponulungan (osondikot om au kosondikot) om miampai kalaab porinta manahak kumaa rayat. Ilo okon karaja asanang montok momonsoi om bulun noh obuli wonsoyon di iso porinta ih kitonggungan.
“Iso porinta ih kitonggungan, mositi papatantu do pogun tokou diti otoonong olumaag, aiso kaandangan dilo, au tokou obuli manahak pongintongan tuh koghunoon rayat dilo onuan pongintongan,” ka disio ontok pinotimpuun do abaabayan kapanahakan Sakadai Kotimpuunon Koposikulan montok susumikul Sikul Kabansaan Tempasuk 1 doros hiti konihab.
Mantad dilo porinta ih kitonggungan mositi papatantu lobi pogulu do pogun id koyuon otoonong, olumaag om aadang, ka disio.
Minoboros ih Salleh do pogun ih otoonong om aandang kapanahak doti liwang kumaa porinta montok popotounda toinsanan kounalan kiguno miagal talun alun, winakas lotirik om waig om balajaran tosonong kopio montok sinakagon timpu tabantalan pogun.
“Nung intongan tokou id pogun ngawi suai, haro tangaanak au kaanu sumikul, bilik darjah nga aiso, mositi balajar id labus (aiso kalas). Iti nantakan sabap pokimamaan porinta do hilo okon manahak pongintongan kumaa balajaran. Tokou id Malaysia diti, ‘Alhamdulillah’, poruntukan tagayo patahakon montok papatantu do tanak ngawi tokou kapaganu balajaran tosonong kopio,” ka disio.
Minoboros isio miampai haro nopo rayat ih kipalajaran om koposodiaan kosiwatan pakarajaan mantad porinta asil ponorinaan pogun om ‘ekonomi’ di opurokis, sinakagon timpu rumikot asanang kaanu karaja om nogi koponoluod doid kotundaan pogun.
Pinosorou di Salleh o rayat tuh toririmo momonsoi ih tosonong kopio om miiso gumirot montok papatantu do pogun diti toririmo id koyuon otoonong om ongogompi mantad toinsanan kawo di au aandang.
Ih tosonong kopio nopo nga papatantu mooi pogun oporinta di porinta ih kitonggungan mantad kunsi toinsasanan dilo nopo nga miiso gumirot, ka Salleh.
Id ramai dilo pinoboros nogi disio o sakadai kiginumu RM20,000 kumaa Koisaan Molohing om Mongingia SK Tempasuk 1 montok poposodia do liwang poundorongan kurita sikul.-Bernama