Monokodung BN montok koburuon: Hamisa
TAWAU: Pokionuon o rayat tumilombus manahak sokodung poimponu kumaa koporintaan barisan Nasional (BN) montok papawakas kagu kopoindalanan kapamanaan do abaabayan ngawi porinta montok asil kiguno om kowosian rayat.
Panakadai Montiri Kotundaan Kotos om Koburuon Teknologi Kopoilaan Datuk Hamisa Samat minoboros do sokodung doulu noh id okitonan undi ontok pomilian tagayo ginumuan ko-14 (PRU14) timpu rumikot kiguno kopio montok popomilo BN kaanu tumilombus kumaraja montok rayat miampai aiso kaantaban om kobolingkangan.
Tumanud disio, nung bogian Parlimen Kalabakan au linansanan mantad BN, om tantu do nuunu nopo kobolingkangan rayat osusa montok owiton doid bogian di pointantu sabap koulalahon lansanon rayat parti gugumaga dilo sondiri ih osusa misokodung miampai koporintaan BN ih momorinta baino diti.
“Iti sabap, kotopotan BN nopo nga iso parti ih kumaraja poompus timpu montok rayat om okon rumikot ontok pomilian tagayo miagal ih nantakan kumaa parti suai,” ka dau.
Noboros disio ahal dilo ontok pinotimpuun do Abaabayan Tadau Paganakan Kampung Murut/Ulu Kalabakan id Dewan Tagayo Kompleks Felda Kalabakan, hiti di songkonihab.
Minoboros Hamisa do BN id suriba kopomuruanan Luguan Montiri Datuk Seri Najib Tun Razak ih pinointutun do koinsomokan ‘Rayat Poguluonon, Kopodimpotan Pokimamaan’, nopo nga kunsi doid ralan tonudon om ‘prinsip’ osuau rayat ih kinamon podimpoton do BN kumaa rayat.
“Slogan dilo nopo nga komitmen om kotopotan koporintaan BN kumaraja montok rayat. Luguan Montiri asaru poposorou toinsanan kopomuruanan parti tuh toririmo popoingkawas do kangai-angaian kotorinaan kumaa rayat.
“Sabap dilo, rayat au minog moosirosi toiko asanang oimbayatan miampai nunu noopo ‘batos’ parti gugumaga sabap BN haro pamalanan di tosonong kopio montok momonsoi iso pogun di otoonong, oumolig, olumag om koburu.
“Nga, toinsanan dilo momoguno do sokodung mantad rayat. Aiso nopo husi tosonong mantad rayat, tantu noh do popoindalan om papanau do toinsoiso abaabayan toikoprojik rayat au doti kaanu papanau toiko momonsoi,” ka dau.
Minoboros isio do kopomuruanan id suriba Boyoon Montiri Tan Sri Musa Aman nogi otopot kopio do Sabah baino haro kinosimbanan tagayo doulu noh idsuang ahal koburuon ekonomi om ‘sosial’.
Ka dau, aiso nopo kapandaian kopomuruanan parti id bogian pogun om Longkod, au doti Sabah kaanu lumaang osodu doid tigulu doulu noh montok tumoguang do nunu noopo ponginaman doulu noh id suang kaganaan balajaran om momoruhang kosiwatan pakarajaan kumaa rayat.
Minoboros Hamisa do totopot nopo rayat Sabah baino kinasib kopio sabap haro porinta di aandang om kiginawo kopio kokomoi nunu noopo kobolingkangan rayat miagal ahal komosikinan om aiso kounalan kiguno ih masaon pindamaan do BN.
“Muhang tokou toinsanan tulun kopuriman do ahal komosikinan om kounalan kiguno nopo nga ahal sompogunan ih sansagan toguangon di toinsanan porinta id pomogunan diti. Ogumu porinta ih au nakaanu minomonsoi irad dilo gisom rayat diolo noinggorit au kaakan (louson) suai ko tumoguang do panangadan kolidasan om toruol.
“Nga, ralan porinta tokou manalasai kobolingkangan rayat doulu noh montok manahak sakadai kumaa tinimungan mosikin, tina notongkiadan sawo, tanak ngawi aiso molohing, tinimungan nakakung om susuai poh nopo nga pialatan di tosonong kopio id pomogunan,” ka dau.
Sabap dilo otopot kopio, nung parti gugumaga mogowit ahal dilo montok papatanom kotukanaan/araatan rayat kumaa koporintaan BN, iyolo otopot nopo nga kuminam mangamu-amu toilalaan rayat sabap koilo iyolo koporintaan Malaysia nopo nga iso porinta tosonong kopio idsuang ahal moningolig nasib rayat baino.