Bas pamain Miri FC nabahik, 12 susumakai nosinduahan
PAPAR: Aiso noindamaan nosinduahan kopoompit do pamain tinimungan mimbuul Miri FC kahapas bas oidau ih sinakazan dino nokomoi nokoompit id kohigaganan ontok kosuvabon koniab.
Huguan Pulis Uvang Papar Deputi Superintendan Ladamah Sulaiman minoboos do kinohigaganan dino nantakan id Kilometer 40 Lahan Kimanis-Papar doos doiti.
Kahapas nokotoimo kopoihaan kiikila jam 9.30 kosuvabon, suminikap o boogizan dau minugad doid tampat kinantakan montok monoodo pomolisaan.
Tumanud dau, bas oidau ih minogovit soginumu 28 susumakai dino nabahik id tanga lahan om nakapangantob goduvoduvo lahan.
Ka disido, poguhui kinantakan iso kulita kavo Toyota Hilux ih kivaa id douvi kulita dino nokomoi miunonoguhu id koozuvon miagab-agab om kohigogon.
Asil dino, papapanau bas dino nokomoi sansagan minonguhok brek impiipio gisom bas nakatangkid om nabahik.
“Papapanau Hilux dino ingkuo po nga au minundoong om tuminihombus tuminagak.
“Soginumu 12 susumakai nakakandai nosinduahan om pinokiubatan sabaagi sumakit habus id Hamin Pongusapan Uvang Papar.
“Suvai ko pamain, kivaa nogi id suvang bas dino nga songuhun tondu om songuhun dazanak kiumul 5 toun,” ka disido pinapatantu do kinantakan ontok kotuubungai doiti koniab.
Minoboos isido, papapanau om susumakai suvai aiso nunuunu nosinduahan.
Minoboos Ladamah do bas dino nokomoi id pindahanan mantad Keningau pougadan doid Tutubpoon Kapal Tumuhud Sompomogunan Kota Kinabalu (LTAKK) kahapas nasalasai pihavanan mimbuul id Keningau ontok tadau Koonom.
Ka disido, ke sdino nokomoi soizukon tumanud Seksyen 43 (1) Akta Padsakazan Lahan (APJ) 1987.
Id ontok dino, mokianu nogi isido kumaa isai-isai noopo ih nokokito do kinantakan dino mooi humikot manaak kopoihaan kokomoi numbul kopolijistahan kulita Toyota Hilux dino.