Sabah haro Boyoon Montiri agaras
# Kaanu popisompuru do mogisusuai kointutunan tinaru - Tajuddin
KENINGAU: Kumoduo Montiri Pomutanaman om Pomorunan Asas Tani Datuk Seri Tajuddin Abdul Rahman minoboros do Boyoon Montiri Sabah Tan Sri Musa Aman sabaagi Boyoon Montiri di agaras sabap nakaanu pinoposompuru do toinsanan kointutunan tinaru id pogun diti.
Ka dau, ogumu pogun id pomogunan diti mogisasangod sabap do momuruan diolo au kaanu monorina pisuaian kointutunan (etnik), koubasanan om agama.
“Nga okon id Sabah, Sabah misompuru...miiso id kopogisusuaian...monongkotoluod kopio oku kumaa momuruan ngawi Sabah,”.
“Iti nopo nga suntu (poinsosonong) id pomogunan...pomogunan obuli balajar mantad tulun Sabah om nogi tulun Keningau,” ka dau ontok minanahak boboroson id abaabayan ponutuban Sodop Karamaian Koubasanan Keningau Padalaman Atas 2018 hiti konihab.
Minoboros ih Tajuddin do iso mantad kolobian ih kiharo id pogun Sabah doulu noh id Keningau nga watas dilo haro kopogisuaian kointutunan (etnik), koubasanan om agama nga apasi iyolo sabaagi iso bansa malaysia ih misompuru.
“Kosonongon diti kapanahak do kaandangan kumaa pogun (Sabah) om pogun (Malaysia) gatang diti aiso id nonggo-nonggo tampat om pogun ih suai...rayat Sabah om doulu noh id Keningau otootopot miiso momonsoi dogo otootopot himayaan om monongkotoluod,” ka dau.
Narayou disio o momuruan ngawi id watas diti doulu noh id puru Lamin Koundangan Pogun Liawan Datuk Sairin Karno, puru Parlimen Keningau Tan Sri Joseph Pairin Kitingan om momuruan ngawi suai id toinsanan bogian sabap nakaanu pinopoubas do ralan tonudon pisompuruan ih tototopot kumaa rayat hiti.
Kiginumu 23 sayau mogisusuai kointutunan tinaru id pointongkop pogun piniala poompus karamaian dilo ih binoros di Tajuddin okon nodi kotopong pogun toiko kabansaan nga kotopong sompomogunan.
“Ounsikou kopio oku minintong do pokitonan ngawi di piniala...iti okon kotopong pogun toiko kabansaan...iti kotopong pomogunan,” ka dau.
Id ramai dilo minonoluod nogi ih Tajuddin do RM50,000 sabagai tanda pamagatangan kokomoi pinanganjuran karamaian kigatang takawas dilo. -Bernama