Moniaga ngawi pinosorou tuh au popoinsawat gatang barang tumanud ginawo sondiri
KENINGAU: Pinosorou o moniaga ngawi tuh au tumanud kohorian ginawo sondiri popoinsawat gatang barang montok mogihum kountungan togumu.
Kumoduo Montiri Pomutanaman om Pomorunan Asas Tani Dato’ Sri Haji Tajuddin Abdul Rahman minoboros do laang dilo kapangawagat doti do rayat om kontodonon do sasaru porinta pasalaon sabap kinoinsawaton gatang barang.
“Apaptut do miampai opunso o Sukai Dagang om Kotorinaan (SST) kiginumu 10 paratus miampai nalanan miampai Sukai Barang om Kotorinaan (GST) 6 paratus, gatang barang nokoinsuriba noh kiginumu 4 paratus.
“Katapi doti haro moniaga popotilombus do 10 paratus SST ih gulu poh piniamung miampai 6 paratus ih pinongontok GST, pinoposiliu dilo 16 paratus kontodonon do gatang barang nokoingkawas.
“Koinsawaton gatang barang okon sabap mantad porinta, nga porinta toririmo monulung papagaan do kawagatan rayat miagal koponguhanan abaabayan Dagang Omuura Nigitan Rayat om susuai poh,” ka dau ontok rinomut id ‘Karnival Jualan Sentuhan Rakyat’ id Padang Bandaran keningau, hiti.
Namot dilo, Boyoon Komulakan Umno Keningau Nik Nadzri Nik Zawawi minoboros do papanau doti Umno Keningau dagang omuura dilo kiginumu intolu sombulan montok monulung tulun ngawi doulu noh id bogian labus kakadaian.
“Iti nopo nga dagang omuura montok kumoinduo ih nakapanau noh id Keningau. Iman-imanon dagai nopo nga muhang monulung rayat doulu noh id Keningau diti tuh kaanu momoli barang kogunoon tikid tadau id gatang di lobi omura.
“Iti okon iso abaabayan ih nointutunan sabaagi ‘gula-gula’ pogului pomilian tagayo, sabap abaabayan diti nogi papanaon id pointongkop pogun,” ka dau.