Musa: Palan kotundaan watas kotonobon Sabah pinalan
TAWAU: Pisokodungan togirot pialatan koporintaan pogun om pisompuruan tumilombus momonsoi mogisusuai kotundaan montok Sabah, om kawawagu, iso palan kotundaan watas kotonobon pinalan kopohompit do watas Tawau, Semporna, Kunak om Lahad Datu.
Boyoon Montiri Sabah, Tan Sri Musa Aman minoboros do laang kawawagu dilo montok mongintong kobulihan di obuli potundaon om poingkawason id apat watas dilo.
Minoboros isio do pisokodungan Unit Mamalan Ekonomi Pogun om Pisompuruan miampai tulungon PEMANDU Associates diti kaanu papaharo do palan kotundaan watas kotonobon miampai 25 projik ponimpuunan pinaatag maya ‘makmal’ toiko ‘Lab Kajian Pelan Pembangunan Wilayah Selatan Sabah’.
“Ilo kopohompit do ponombuluian, pomutanaman om pomorunan tumau mamau ih kaanu doti popoingkawas konuonuan tagayo om sokurangkurang do mongukab 50,000 kosiwatan pakarajaan kumaa rayat id watas nokoompit om posorili,” ka dau ontok minanahak boboroson pinotimpuun do tumongkop Yayasan Sabah songowian rayat bogian Zon Bogian Kosilahon Sabah id padang kakadaian Tawau hiti, konihab.
Nokotindapou nogi id abaabayan dilo nga ih Kumoduwo Montiri Balajaran Takawas ih nogi Puru Parlimen Tawau Datuk Mary Yap Kain Ching, montirimontiri kabinet pogun, lansanon ngawi rayat om boyoon ngawi koupisan pogun om pisompuruan.
Minoboros ih Musa do palan kotundaan irad dilo nogi maan pohoroo montok kopolombusan kotundaan id Sandakan, Beluran, Labuk om Kinabatangan.
Id ontok dilo, ka dau osiliu kogunoon montok koporintaan Barisan Nasional doulu noh id suriba kopomuruanan Luguan Montiri Datuk Seri Najib Tun Razak minggisom om kumaraja popotunda Sabah om Malaysia koinsasanai.
“Koporintaan BN binuruanan di luguan montiri ih kiginawo kopio kumaa Sabah, isio (Najib) au ababasan, au orosian montok manahak do poruntukan songkuro ginayo noopo montok rayat pogun diti,” ka disio mikuo nonuan tapapan tologod mantad kiikira 5,000 tulun nokotindapou ih minokinongou boboroson momuruan numbur iso Sabah dilo.
Namot dilo, minoboros ih Musa do laang Tinimungan Yayasan Sabah ih pinaharo mantad podi toun 1966 dilo toririmo monulung rayat pogun diti kangaam miampai kapamanaan timpu.
Tumanud dau, suai ko ponulungan sikulasip Yayasan Sabah nogi monginduwo karaja montok manahak kolumaagan koposion rayat kaamung noh papaharo do kosiwatan ngawi pakarajaan. -Bernama