‘Gaga’on tana Sabah’
# Kuasa rayat Sabah koponulung papalantoi ahal porinta - Hishammuddin
KOTA KINABALU: Kuasa tagayo mantad rayat Sabah pokigunoon montok poposigampot ahal om hibokon Komontirian Gugumaga.
Montiri Gugumaga Datuk Seri Hishammuddin Hussein minoboros do komontirian dau haro iman-imanon, pamalanan om hibokon montok pogun Sabah.
Mantad dilo, muhang isio do potitikid iman-imanon, pamalanan om hibokon dino nokomoi osiliu kotopotan om kapanahak do asil kumaa rayat Sabah doulu noh puru ngawi Tinimungan Susumangod Malaysia (ATM).
Suai ko ilo, sumodia nogi bogian dau montok papatantu do ahal kolidasan, koumoligan, balajaran, pingludaan om pomulaminan kaanu silihon tinan.
“Miampai haro nopo kuasa di tagayo, kanau tokou papatantu do aiso tinan ih monoinu tana kinasib Sabah.
“Popotumboyo tokou nogi do nuludan kopomuruanan id pogun diti, salagi porinta buruanon di Barisan Nasional (BN), gaga’on tokou tikid insi tana Sabah diti,” ka dau.
Noboros disio ahal dilo kopinamot ‘Program Jelajah Perkasa Perwira’ om Osuau Monokirumoh MOntiri Gugumaga Songowian Tinimungan Pamngkalan Susumangod Daat Diraja Malaysia (TLDM) hiti konihab.
Pinosorou nogi di Hishammuddin tuh sunduan ih pinokito di puru ngawi TLDM kaanu popotilombus ‘momentum’ diolo gisom orikot timpu Pomilian tagayo Ginumuan (PRU).
Tumanud dau, kalapas PRU ‘momentum’ dino nokomoi maan podolino montok poposigampot do koinsasanai ahal porinta montok tinimungan ngawi doung susumangod id pogun diti.
“Iti sabap, haro iman-imanon tokou, kalansanan, visi, komitmen di au opibahagi montok kogunoon togumu.
“Nga onu ih lobi kiguno, ahal moningolig kotundunan potitikid puru ATM tatap osiliu ahal tagayo,” ka dau.
Id ramai dilo, minoi nogi Hishammuddin intong do kinaraagan id sunsuyon Kampung Gentisan ih nosiliu ralan piromutan doid Pangkalan Sepanggar.
Pinotimpuun nogi isio do kiosk petrol ih winonsoi id suang bogian pangkalan dilo asil pinisokodungan pialatan Petronas om TLDM.
Kiosk petrol dilo nogi naganapan miampai kadai mini osusu sabaagi kounalan montok puru ngawi TLDM.
Nokotindapou nogi ih Montiri id Koupisan Luguan Montiri Datuk Seri Panglima Abdul Rahman Dahlan, Montiri Kotundaan Rayat om Ahal Momoguno Datuk Jainab Ahmad Ayid om Panglima Armada Timur Laksamana Madya Datuk Syed Zahiruddin Putra Syed Osman.