Lahad Datu nokoponurat kinoinsuribaan 43 paratus kes koimaan taraat ‘indeks’ idsuang timpu 83 tadau
LAHAD DATU: Polis Lahad Datu nokoporikud do kinoinsuribaan ginumu kes koimaan taraat ‘indeks’ kumaa 40 kes mantad podi wulan (Januari) 2018 piagalon 70 kes montok timpu ih iso’i di toun nakatalib.
Boyoon Pulis Watas Lahad Datu, Asisten Komisioner Hamzah Ahmad minoboros do mantad podi 1 Januari gisom 24 Mac toun diti kinoinsuribaan kiginumu 30 kes toiko 42.86 paratus nokosurat.
“Kinodimpotan dilo okon ko asanang momodimpot nung aiso sokodung om pisokodungan potilombus toinsanan tulun om pakakaraja Pulis Diraja Malaysia ih toririmo manahak ‘komitmen’ au opibahagai montok papanau do nunu noopo pinonguludan karaja kopulisian di napalan,” ka dau.
Noboros disio ahal dilo ontok minanahak boboroson kopinamot Koponguludan Momuondom Tadau Pulis ko-211 nayatan watas id Natad Longkod Upis Pulis Watas Lahad Datu, di kosuabon konihab.
NOkotindapou nogi ih Puru Parlimen Silam Datuk Nasrun Mansur, Adun Lahad Datu Datuk Mohd Yusof Apdal, om Upisor Watas Iman Ali.
Montok rikud, kes jenayah indeks kiginumu 326 kes ontok toun 2017 piagalon 346 kes toun 2016 om Lahad Datu nokosigampot ponokotanda kinangaian tagayo di pinatatap do Bukit Aman ilo nopo nga kinoinsiribaan limo paratus tikid toun kaanu popotilombus montok timpu limo toun misusuut.
Tumanud Hamzah, mantad podi 83 tadau kiginumu 421 kes kinagakaman dadah pinosurat piagalon 203 kes id toun nakatalib.
Om montok kes trafik nopo nga, kiginumu 188 kes koligaganan noduso, 11 kes kopohompit do kinosindualan om 177 kes koligaganan kopohompit do kinaraagan padsakaian noopo.
Montok laang kopogirotankuasa saman nopo nga, kiginumu 5,699 kaping saman nakalabus noh sabap mogisusuai kasalaan.
Id ‘Ops Kereta Sapu’ kiginumu 11 tinan padsakaian nahau sabap kasalaan tumanud Seksyen 33 Akta Lembaga Pelesenan Padsakaian Padagangan 1987 om saman sabap kasalaan tumanud Seksyen 23 (2) Akta Padsakaian Ralan 1987.
Pokionuon nogi di Hamzah o tulun togumu monorimo do boroson kiguno kopio Boyoon Pulis Pogun Tan Sri Mohamad Fuzi Harun miampai popotilombus do pisokodungan om piupakatan di togirot pialatan pulis om tulun ngawi katanud miampai tulu Tadau Pulis “Pulis om Tulun Ngawi Aiso Pitongkiadan”.
“Alansan kopio oku nogi tuh toinsanan tulun karati do karaja ngawi om ponokialitan pulis timpu diti. Yahai pakakaraja IPD Lahad Datu toririmo minggisom manahak kotorinaan di tosonong kopio miampai au mongira timpu om hinonggo noopo montok kapasanangan tulun ngawi koinsasanai montok mintamong kotoonongan doulu noh id Lahad Datu diti,” ka dau.
Id ramai dilo, kiginumu 68 sijil pamagatangan pinatahak kuminaan limo upisor wanan, 38 upisor osuriba, 18 tulun ginumuan om turu puru Perkep.