Mokipihi kikatabazan om koponokiahit papatantu do kahantazan BN ontok PRU14: Yamani Hafez
PENAMPANG: Isai-isai noopo mokipihi kikatabazan om koponokiahit montok papatantu do kahantazan Barisan Nasional (BN) ontok Pomihian Tagazo Ko-14 (PRU14) onuan do tonggungan tagazo, au mongila umul otuvo toi omuhok.
Poniikon Komuhakan BN Sabah Yamani Hafez Musa minoboos, otumboyo o boogizan disido do Huguan Montili Datuk Seri Najib Tun Razak monoodo koputusan di tavasi kozo montok momihi mokipihi (calon) montok tumoguvang PRU ontok timpu diti.
“Nakaatod zou no nuhudan ngaan ogumu mokipihi tomuhok om noikot no di timpu dotoou okon noopo Umno nga pikouvangan BN popokito do kobulihan kavavagu.
“Montok boogizan Penampang, zou kivaa ‘calon’ idsuang pomusaavan zou nga Huguan Montili ih koiho monoodo koputusan,” ka disido ontok kosoomo kahapas pinotimpuun do ‘Karnival Kerjaya’ Komuhakan BN, doiti koniab.
Au disido ohimon do parti pikouvangan BN momoguno do hobi ogumu kobulihan kavavagu hoohobi tinimungan tomuhok miaga nogi boogizan gugumaga.
Kokomoi pinoimaganan ‘manifesto BN’ ontok sodop Koonom, pinatahang disido do kivaa piipio ahal id suang manifesto dino kapanaak dati do asil tagazo kumaa layat Sabah montok koinsasanai.
“Piahatan dino nopo nga Pidandian Malaysia 1963 (MA63) id nombo, baino kamampu tokou momodimpot boos papatantu songovian id suang ahal diti. Suvai ko iho, Kopolintaan Pisompuuvan nogi mamajamin papahaab do ‘jalur telekomunikasi’ id Sabah om Sarawak miampai gatang RM2 bilion om lotilik RM2.3 bilion.
“Kotoimo nogi Sabah do ‘subsidi poimbida’ hoohobi mantad kavo kapanaakan vaig suvai ko ogumu vagu manifesto ih ‘realistik’ om koontok kozo miampai kopokionuon layat ontok timpu diti,” ka disido.
Kikahansanan nogi zi Yamani do hamin ‘transit’ komuhakan ih pinaatag do todoon id Semenanjung Malaysia kaanu popouhan id Sabah.
Namot dino, kikoompitan karnival dino nokomoi, pinatahang disido do hobi mantad apat ngoibu komuhakan nokotindapou montok mamaga’au kosivatan pakalajaan ih posodiaon.
“Soginumu 57 touki nokoikot pinapahantoi do abaabazan diti om kikahansanan zou karnival diti maan todoo do tiid toun montok poposodia do kosivatan pakalajaan kumaa komuhakan pogun diti,” ka disido.
Nokotindapou nogi id abaabazan dino Monijol Tagazo Tinimungan Sabanilam Enterprise Sdn Bhd Ceasar Mandela Malakun om tombuhui tapantang ih suvai.