‘Karnival Kerjaya’ Komuhakan BN poposodia 3,000 kosivatan pakalajaan
PENAMPANG: Kikoinsamadan miampai kopokionuon tinimungan komuhakan ngavi id
Sabah, Tinan Komuhakan Barisan Nasional (BN) pogun mangazu do ‘Karnival Karjaya’ ih poposodia do 3,000 kosivatan pakalajaan.
Huguan Komuhakan dino Yamani Hafez Musa minoboos do kapangazuvan karnival dino koniab, asil mantad kopoihaan ih pinotimung maza Abaabazan Tumongkop Transformasi Nasional
2050 (TN50) om ‘Kolokium Belia’ ih papanaon id pointongkop pogun.
“Poposodia tokou do kosivatan pakalajaan sabap iti no ahal kiguno ih pimbooson do tuhun tomuhok.
“Om nogi popoinsiibo gontob aiso kalaja, papatantu tokou nogi obuli gunon tinimungan tomuhok montok onuon kumalaja,” ka disido ontok sinoomo kahapas pinotimpuun do karnival dinodoiti.
Minoboos isido Tinan Komuhakan Pogun maagnu pongintongan tototopot kahansanan tinimungan komuhakan ngavi id pogun diti om minggisom montok momo’uang gatang abaabazan tinan dino tu kopogovit asil doid tinimungan nokoompit.
Minoboos Yamani Hafez do kiikila 4,500 aplikisin temuduga notoimo maza id kohuzungan, om gisom tangadau tiinu, hobi 2,000 minonoodo aplikisin sondii.
Poompus karnival tuminimpuun jam 8 gisom 9 dongotuvong dino pinapanau, suat koposodiaan pakalajaan maan pataako doid mogium pakalaja miampai ‘in situ’ ih nakahantoi id suang timpu temuduga mantad 57 komponi misosondii ih nokoompit id karnival dino.
Desideria Gilbert, 19, mantad Tambunan nopo nga piahatan ih nokotoimo suat koposodiaan om pataakon sondii di Huguan Komuhakan BN pogun dino.
Isido ih nokotindapou mantad po di jam 8 kosuvabon tiinu kikosivatan monoodo aplikisn id iso komponi spa kinoizonon id Kota Kinabalu ih tuminanud do karnival dino.
“Ounsikou zou. Au zou oondom otoimo kalaja id boogizan ‘trapi spa’. Nung id Tambunan, onuon zou kumalaja sabaagi mongila usin kadai noopo,” ka disido.