Rela kikuasa mongilag pongindaraatan tinan di aiso tonggungan kumaa porinta: Salleh
KOTA BELUD: Puru Koupisan Sukarelawan Malaysia (Rela) haro tonggungan di tagayo montok monulung porita mongilag ahal di au osonong ih parayaton di tinan aiso tonggungan maya ‘media sosial’.
Montiri Komunikasi om Multimedia Datuk Seri Dr Salleh Said Keruak minoboros do suai ko monulung mintamong koumoligan om kotoonongan id pogun diti, Rela baino ngi haro tonggungan tagayo montok monulung porinta montok papatantu do mogigion id bogian sompori-pori kapaganu kopoilaan di koontok om ototopot.
“Puru Rela ih nalantik noh porinta mositi miwoyo porinta papatarang kumaa tulun kampung montok miingat-ingat miampai kopoilaan ih parayaton maya ‘media sosial’.
“(Iti) sabap pongindaraatan om kopoilaan au otopot ih parayaton maya ‘media sosial’ dilo obuli kontodonon do pibabakan tinaru, agama om nogi id pialatan paganakan sondiri. Soira haro pibabakan, koumoligan om kotoonongan pogun nga araag nogi,” ka disio.
Noboros disio ahal dilo ontok minanahak boboroson id abaabayan momuruan songowian puru Rela id watas Kota Belud, hiti konihab.
Minoboros ih Salleh do kabar au otopot toiko paparaat baino nosiliu iso sangod pogun, sabap ilo obuli momiraag do pisaan di nokogirot mantad podi kinalantaian.
“Mositi potilombuson tokou kinalantaian di naannu tokou solinaid diti. Mimang tokou gaab kinalantaian dilo aanu momurimon di toinsanan rayat id pogun diti...porinta ih haro baino mantad gulu poh minggisom monuang kinalantaian miampai papanau do mogisusuai kotundaan id nonggo noopo id pointongkop Malaysia.
“Sundung irad dilo mositi miingat-ingat tokou sabap ontok tokou momurimon koyuon kinalantaian ontok timpu diti, haro nogi tinan labus ih ataian miampai kinalantaian ih naanu pogun tokou...om iyolo (tinan ih ataian) kuminam mogihum ralan montok momiraag do pogun tokou doulu noh momoguo kabar au otopot toiko paparaat ih parayaton maya ‘media sosial’,” kawagu dau.
Minoboros ih Salleh do porinta toririmo minggisom poposodia do kopogonopan ih pokigunoon tuh pinggisoman montok monulung mintamong kotoonongan pogun kanau papanau miampai tososonong om kiasil.
“Mantad dilo, Rela mositi monulung om monokodung poimponu laang porinta montok gumaga do kaandangan om kotoonongan pogun om ounsikou oku sabap kiikira 25,000 puru Rela id Kota Belud tumilombus songowian porinta montok monulung papatantu do kolumaagan id pointongkop watas diti,” kawagu dau. -Bernama