Kadazan om Sina kosudong kozo mi’iso ginavo mongundi calon BN Kapayan
PENAMPANG: Vahu momuu’an Kadazan kaampai mohoingon kampung (KK) om poniikon Tinan Koumohigan om Kobuu’on Kampung (JKKK) mokianu tuhun ngavi dino montok mongundi calon Barisan Nasional (BN) montok tiikoon Hamin Koundangan Pogun (DUN) Kapayan Datuk Francis Goh ontok Pomihian Tagazo Ko14 (PRU14), 9 Mei diti.
Angatan nogi dosido o tuhun ngavi Sina id boogizan dino montok mongundi Francis di ogumu no minanaak koponuhungan mantad po di nadadi huguan boogizan MCA Kapayan apat toun nakatahib.
“Zotokou (Kadazan om Sina) nopo nga tambahut tavasi, mantad diho zotokou mositi do mogisosokodung montok mongundi Francis om papadadi disido sabaagi hansanon layat Kapayan tu kaanu isido popotihombus do kotoinaan tavasi kozo doid layat om popotounda boogizan doid gontob di hobi tavasi,” ka Mohoingon Kampung Koidupan KK James Muhamad.
Vahu mohoingon kampung (KK) om Poniikon JKKK dino nokomoi nopo nga mantad Kg Hungab, Kg Tunoh, Kg Koidupan, Kg Nagasiba, Kg Nosoob, Kg Kobusak, Kg Kapayan om Kg Peringatan, ih nokoikot montok minonoodo pitimbungakan abal doiti, koniab.
Minoboos James, au nakaanu Parti DAP montok minonuhung layat Kapayan mantad po di nopihi minomuu’an boogizan dino mositi dodizon pangajalan di tuhun ngavi Kadazan om Sina.
“Montok dagai (Kadazan), monokiaha zikoi no sabap nokopiuman do DAP au kaanu monuhung layat id Kapayan.
“Onu po vagu Kapayan, zi Lim Guan Eng id Pulau Pinang nga au kaanu monuhung tuhun ngavi Sina ih nokopongundi no om minanaak kamanangan kumaa disido. Tuhun malazu no tuhungon disido.
“Mantad diho, baino diti tuhun ngavi Kadazan om Sina mositi miiso ginavo montok manaak kamanangan kumaa Francis montok popomiho disido popotihombus do kalaja tavasi disido id Kapayan,” ka disido.
Mohoingon Kampung Kobusak KK Michael Boijut minoboos, kangaam kozo zi Francis onuan kuasa montok dumadi hansanon layat Kapayan sabap isido nokopokito no tonggungan disido montok monuhung layat id boogizan dino.
“Isido songuhun ih osuau, obintuhung, asaanang insomokan om apaagat minsuvang kampung, om sohinaid apat toun diti isido no ih kuminalaja id pointongkop vahu kampung id DUN Kapayan,” ka disido.
Ka disido isido au miaga nung piagahon Dr Edwin Bosi mantad DAP ih au nakaanu minanaak kotoinaan kahapas nopihi nadadi hansanon layat ontok PRU13.
“Nga, zotoou kivaa nasib tavasi kivaa songuhun momuu’an ih nokoimbuhai ontok timpu dino, isido nopo nga zi Francis ih asaasau manaak sakadai om kapaganu do kousinan om poluntukan mantad polinta mozo pituubungan tavasi disido miampai montili ngavi Kabinet,” ka disido.
Michael minoboos, nakaanu zi Francis minonuhung kampungkampung id Kapayan, minonoodo au okuang 35 lahan vatu om 15 lahan notiil.
Suvai ko iho, nakapaatod nogi isido do mesin dau montok manalasai do kobohingkaangan palit nosonsong sabap do hizud id Kapayan.
“Okon iho noopo, minanaak nogi isido do sapi montok pootodon doid kampungkampung tuhun ngavi kiugama Silam om songovian ngavi dosido mamalamai do Hari Raya haji,” ka disido.
Suvai ko iho kavagu disido, nokoponoodo nogi zi Francis do ponimungan kousinan balajalan sondii iho nopo nga ‘Dana Pendidikan Datuk Francis Goh’ (DPDFG) montok monuhung tanak ngavi aiso kamampuan om susumikul kinangazan tavasi id Kapayan.
Mantad kavo kaagamaan ka disido, nokoponuhung nogi zi Francis do minanakadai panadaan Gereja St Paul di Kg Nagasiba.
“Okito ku, pinaatod isido di minamangun (Kinoingan) montok monuhung layat Kadazan id saaviavi DUN Kapayan om izikoi mamagatang kozo kinoikotan disido ih nakakalaja no sabaagi ‘wakil rakyat’ sundung pia au po nadadi ‘wakil rakyat’.
“Mantad diho, iti no kosivatan montok dotokou miiso ginavo montok mongundi Francis montok papadadi disido ‘Wakil Rakyat’ id DUN Kapayan,” ka disido.