Penegap institusyen ruang bilik patut dikemerat
Apai ti nyadi ketuai ngempu tanggungpengawa nempa penuku, penegap sesebengkah komuniti
KUCHING: Komuniti ke manah ayan asil ari penegap institusyen ruang bilik lalu ketegal nya raban apai ke nyadi ketuai patut ngemerat pemaik ruang bilik diri.
Menteri Dagang Temuai Datuk Amar Abang Johari Tun Abang Openg madah, enti raban apai enda bejalaika tanggungpengawa sida nitihka patut, suah agi institusyen ruang bilik deka pechah.
“Ba atur pemansang menua enggau komuniti, raban apai megai tanggungpengawa besai begulai enggau indai.
“Apai nyendiaka belanja tauka utai bukai ke diguna ba tiap ruang bilik, indai ngatur semua pengawa dalam ruang bilik.
“Institusyen ruang bilik patut dikemerat ngambika ulih nempa sebengkah komuniti ke manah sereta tegap lalu apai patut ngemeratka pekara nya,” ku iya ba pengerami ngintu Hari Apai di The Hills ditu, kemari.
Pengerami ti keterubah iya diintu lalu diatur nengah
“Institusyen ruang bilik patut dikemerat ngambika ulih nempa sebengkah komuniti ke manah sereta tegap lalu apai patut ngemeratka pekara nya." Datuk Amar Abang Johari Tun Abang Openg Menteri Dagang Temuai
kerejasama ejensi perintah enggau NGO begulai enggau Biro Pemansang Orang Indu enggau Ruang Bilik, nerima puji ari Johari lalu nya mandangka kaul entara apai enggau indai chukup tegap.
“Kaul nya meri peransang ngagai ruang bilik meretika guna ngadaka komuniti ke manah,’ku iya.
Dulu agi ari nya, Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah ba jaku pengelalu madah raban apai megai tanggung pengawa besai ba atur pemansang bala anak ari sida ada nyentukka besai.
“Tajapan penyayau indai enda ulih diganti, anak begunaka apai ngambika tau angkat besai enggau regas.
“Diatu, pangku pengawa apai ukai semina nyendiaka belanja ngagai ruang bilik, tang sida patut seruran ngaul diri ba pengidup anak sida.
“Apai nyaup mutarka penanggul ke ditapi anak, ngajar atur ke patut dititih dalam pengidup, nyikap sida enggau penemu ngambika tau napi pemar jemah sereta nyadi kaling ngagai bala anak,”ku iya.
Iya mega madah maya bemain enggau bala anak tau dikena raban apai nerenak sekeda reti enggau basa dalam pengidup, bejaku enggau anak sereta ngedut kaul emosi begulai enggau anak.
Bela datai Menteri Muda Pelajar Tumu Nembiak Mit Rosey Yunus, Menteri Muda Pengintu Pengelantang Pendiau Robert Lawson Chuat, ADUN Semariang Sharifah Hasidah, ADUN Pantai Damai Abdul Rahman Junaidi, Direktor Biro Wanita Norliah Ahmad enggau orang bukai.