Dr Chan: Soon Koh patut badu ngiruh diri ngachau parti SUPP

KUCHING: Enti nitih, udah ningkilka diri ari Parti Seati Rayat Sarawak (SUPP), Dato Sri Wong Soon Koh enda patut ngiruhka diri ‘masuk champur’ pekara parti ke pengabis lama di Sarawak nya.

Presiden Dipebasa SUPP Datuk Patinggi Tan Sri Dr George Chan madah SUPP ukai agi parti ke dipilih Wong, nya alai, ku iya, Menteri Opis Kandang Menua enggau Pe- mansang Komuniti nya enda patut ngachau parti nya agi.

“Iya (Wong) udah ningkilka diri ari parti...Nya alai, enda patut iya ka ngiruhka diri ngachau parti,” ku Dr Chan madah maya dirandau media nyerumba pengawa Nyuaka Perais pekit Main Golf Classic kemari.

Dr Chan ti mega kala nyadi Sapit Kepala Menteri madah, iya tetap ngetanka SUPP, ngambika parti nya agi ulih endur ngenduh.

“Aku tetap ngetanka SUPP laban aku agi nyadi ‘presiden dipebasa’ SUPP nyentukka seharitu,” ku iya.

Ba randau bukai bekait enggau pemati Kaban Kunsil Nengeri (ADUN) Bukit Asek Wong Ho Leng, iya madah ketuai penyakal patut nunda chunto niang ke udah naka ulih sama beratika pemansang Sarawak.

Iya madah, niang Wong orang ke manah sereta berani maya mantaika penemu iya ba aum Kunsil Nengeri (DUN).

Ku iya, menua tu begunaka tuai ba penyakal ke ngembuan ulah baka niang Wong.

“Aku beratika niang orang ke manah sereta berani.

“Tuai pemesai penyakal patut nunda chunto baka niang ke mayuh udah ngereja pengawa iya ke pemansang sereta nyaga pemerat menua tu,” ku iya.

Ba pekara ke sebaka nya mega, Mandal Presiden PKR See Chee How nyemaka pemati Wong seiti pengelenyau ke besai, ukai semina ngagai Parti Tindakan Demokratik (DAP) tang mega ba Pakatan Rakyat (PR) Sarawak.

“Nyadi ketuai penyakal di menua tu, niang seruran besedia bekunsika penemu iya sereta meri jaku lalau ngagai sapa-sapa ke betanya ba iya. Iya ngumpul teks jaku iya di DUN, enggau saut ba tanya ke ditanya iya lalu diberi iya ngagai ADUN ke baru, ngambika bisi endur sida iya ngulihka penemu.

“Kami mega seruran berandau enggau iya minta ajar lalu sepemanjai dua taun enggau DUN, niang mandangka ulah iya ke nyadi ketuai ke tau digagaka chunto berandau enggau sida bukai nyengkaum enggau kami ke ba PKR, sebedau iya mantaika penemu iya tauka pemutus iya dikedeka nyengkaum Pakatan Rakyat,” ku iya. See mega ngenataika penyinu ati iya ngagai sida Wong sebilik enggau DAP kelimpah ari peragam ati iya ba pemati Wong tu baka diri sebilik.

“Aku enda kala bebali ati sereta pengawa ke digaga niang sepemanjai pengidup iya kelebih agi ke pemaik menua tu sereta rayat Sarawak,” ku iya.