Pampang Indu SPDP ngiga chalun bediri ba sitak ungkup parti nya
KUCHING: Pampang Indu Parti Progresif Demokratik Sarawak ( SPDP) benung ngiga chalun indu ke deka bediri ngarika parti ba pengawa bepilih ti deka datai tu ila.
Ketuai Pampang Indu Datuk Chiew Yen Chew madah, sida udah berengkah bejalaika pengawa ngemujur juluk nya ba lapan penuduk ke diungkup ngagai parti dalam Barisan Nasional (BN) iya nya di Tasik Biru, Krian, Pakan, Meluan, Marudi, Batu Danau, Bekenu enggau Ba Kelalan.
Taja pan mayuh raban udah ngalih nyereta Parti Tenaga Rakyat Sarawak (Teras), iya madah SPDP nadai kurang chalun ti ulih menang nyengkaum chalun ari raban indu ba sekeda penuduk ari lapan iti nya.
“Ungkup pengawa bepilih ke deka datai, aku sekali agi madah kami deka meda orang indu bediri ngarika parti.
“Kitai udah berengkah bejalaika pengawa lalu aku pechaya kitai bisi chalun ari Indu SPDP ke ulih menang ba pengawa bepilih ti deka datai,’ku iya ba sebengkah aum enggau pengarang berita di Indu Opis SPDP ditu, kemari.
Iya mega madah Indu SPDP seruran bejalaika pengawa ti tau ngeringka parti lalu pengeran nya ulih dipeda pengudah mayuh pampang Indu ke baru ditumbuh ke alai sida mega majakka pengawa ngambi kaban baru.
“Tiga puluh lapan pampang Indu ukai semina tegap beserakup, tang kitai mega udah numbuhka lapan pampang ke baru. Pengujung bulan tu kitai nyadang deka bisi 46 buah pampang Indu sereta 105 pampang mit.
“Pengawa ngerejista kaban baru ransing diatue lalu nerima timbal ke manah,’ku iya.
Iya mega nyangkal tuduh ti madah mayuh kaban Wanita deka ngalih nyereta TERAS munyika berita lalu madah semina lima iku kaban Indu udah nganjung surat ningkilka diri.
Chew mega madah Indu SPDP netapka TERAS enda patut diterima dalam serakup BN tauka diterima nengah formula ke dikumbai BN Plus.
“Kami Indu SPDP chukup deka majak bekimpin ngelaban pekara tu. Kitai udah bisi mayuh komponen parti (dalam BN) lalu Teras enda patut diterima nengah fomula BN Plus” ku iya.